“மரணங்களை விற்கும் விஜய் அரசு?…” ‘அரசு வேலை’ ஆஃபர்… கொதித்து எழுந்த சீமான்… இரவு பகலாகப் படிக்கும் இளைஞர்கள் நிலை… தமிழக அரசியலில் வெடித்த புதிய சர்ச்சை…!

தமிழகத்தில் தவெக ஆட்சிப் பொறுப்பேற்றது முதல், கரூரில் நடந்த கட்சியின் பரப்புரைக்கூட்ட நெரிசலில் சிக்கி 41 பேர் உயிரிழந்த பேரவலம் பெரும் அதிர்வலைகளை ஏற்படுத்தியிருந்தது. பாதிக்கப்பட்ட குடும்பங்களுக்கு ஏற்கனவே ரூ.35 லட்சம் வரை துயர்துடைப்புத் தொகை வழங்கப்பட்டுவிட்ட நிலையில், தற்போது அவர்களுக்கு ‘அரசு வேலை’ வழங்கப்படும் என முதல்வர் விஜய் அறிவித்துள்ளார். இந்த அறிவிப்பு, தவெகவில் இணைந்த முன்னாள் அதிமுக சட்டமன்ற உறுப்பினர் எம்.ஆர். விஜயபாஸ்கரின் வரவாலும், வரவிருக்கும் கரூர் இடைத்தேர்தலை மனதிற்கொண்டும் நடத்தப்படும் ஒரு மலினமான வாக்கரசியல் நாடகம் என்று நாம் தமிழர் கட்சியின் ஒருங்கிணைப்பாளர் சீமான் கடுமையாக விமர்சித்துள்ளார். விபத்து நடந்த 50 நாட்கள் வரை பாதிக்கப்பட்ட மக்களைச் சந்திக்காத முதல்வர், இப்போது தேர்தல் ஆதாயத்திற்காக மனிதாபிமானம் என்ற போர்வையில் கரூருக்கு விரைவது அற்பத்தனமானது என்றும் அவர் சாடியுள்ளார்.

அரசு வேலைக்காக இரவு பகலாகப் படித்துவிட்டு லட்சக்கணக்கான தமிழ்நாட்டு இளைஞர்கள் காத்துக்கொண்டிருக்கும் வேளையில், தகுதித் தேர்வு எழுதிய ஆசிரியர்கள், தற்காலிக செவிலியர்கள் மற்றும் தூய்மைப் பணியாளர்களின் பணி நிரந்தரக் கோரிக்கைகளை தவெக அரசு இன்னும் நிறைவேற்றவில்லை. நாட்டின் பாதுகாப்புக்காக எல்லையில் உயிர்த்தியாகம் செய்த ராணுவ வீரர்களின் குடும்பங்களுக்கோ அல்லது நச்சுவாயு தாக்கி உயிரிழந்த தூய்மைப் பணியாளர்களின் குடும்பங்களுக்கோ கிடைக்காத அரசுப் பணி, திரைக்கவர்ச்சிக்குப் பலியானவர்களின் குடும்பங்களுக்குக் கிடைப்பது எந்த விதத்தில் நியாயம் என்று சீமான் கேள்வி எழுப்பியுள்ளார். எனவே, இந்த மரணங்களுக்கு முழுமுதற் காரணமான தவெக அரசு, இடைத்தேர்தல் லாபத்திற்காக அரசு வேலையைத் தாரைவார்க்கும் தவறான முடிவை உடனடியாகக் கைவிட வேண்டும் என்றும், கூடுதல் உதவி தேவைப்பட்டால் அதை முதல்வர் விஜய் தனது சொந்தப் பணத்திலிருந்தோ அல்லது கட்சியின் சார்பாகவோ வழங்க வேண்டும் என்றும் அவர் வலியுறுத்தியுள்ளார்.