விஜய்-சங்கீதா விவாகரத்து வழக்கு….. “இன்றே தீர்ப்பு வேண்டும்”…. லண்டனில் இருந்து களமிறங்கிய சங்கீதா தரப்பு…. பிற்பகலில் வரப்போகும் முக்கிய உத்தரவு…!

நடிகர் விஜய் மற்றும் அவரது மனைவி சங்கீதா இடையேயான விவாகரத்து மனு மீதான விசாரணை, செங்கல்பட்டு குடும்ப நல நீதிமன்றத்தில் இன்று மீண்டும் விசாரணைக்கு வந்தது. நீதிமன்ற வளாகத்தில் இரு தரப்பு வழக்கறிஞர்களும் காரசாரமான வாதங்களை முன்வைத்த நிலையில், வழக்கு விசாரணையை நீதிபதி பிற்பகலுக்கு ஒத்திவைத்து உத்தரவிட்டுள்ளார். 1999-இல் திருமணமான இத்தம்பதியினருக்கு இரு பிள்ளைகள் உள்ள நிலையில், ஏற்பட்ட கருத்து வேறுபாடுகளால் கடந்த டிசம்பர் மாதம் சங்கீதா செங்கல்பட்டு நீதிமன்றத்தில் விவாகரத்து, நிரந்தர ஜீவனாம்சம் மற்றும் நீலாங்கரை வீட்டில் வசிக்கும் உரிமை கோரி மனு தாக்கல் செய்தார்.

இன்றைய விசாரணையின் போது விஜய் தரப்பில் ஆஜரான மூத்த வழக்கறிஞர்கள், “தற்போது விஜய் அவர்கள் தீவிர அரசியல் பணிகளில் ஈடுபட்டுள்ள சூழலில், நேரில் ஆஜராவதில் பாதுகாப்பு அம்சங்கள், போக்குவரத்து நெரிசல் மற்றும் நடைமுறைச் சிக்கல்கள் உள்ளன” எனச் சுட்டிக்காட்டினர். எனவே, இந்த வழக்கு விசாரணையை வேறொரு தேதியை நிர்ணயித்து ஒத்திவைக்க வேண்டும் என்று விஜய் தரப்பு வழக்கறிஞர்கள் நீதிமன்றத்தில் கோரிக்கை முன்வைத்தனர்.

அதேவேளையில், மனுதாரரான சங்கீதா தரப்பில் லண்டனில் இருந்து காணொலிக் காட்சி மூலமாக வழக்கறிஞர் ஆஜரானார். விஜய் தரப்பின் ஒத்திவைப்பு கோரிக்கைக்குக் கடும் எதிர்ப்பு தெரிவித்த அவர், “மனு தாக்கல் செய்யப்பட்டு பல மாதங்கள் ஆகிவிட்டன; தொடர்ச்சியாகப் பல்வேறு காரணங்களைக் கூறி விசாரணை தள்ளிவைக்கப்பட்டு வருகிறது. மேற்கொண்டு காலதாமதம் செய்யாமல், வழக்கை இன்றே நேரில் அல்லது காணொலி வாயிலாக முழுமையாக விசாரிக்க வேண்டும்” என்று உறுதியாக வாதிட்டார்.

இரு தரப்பு வாதங்களையும் கேட்ட செங்கல்பட்டு குடும்ப நல நீதிமன்ற நீதிபதி, வழக்கை உடனடியாக வேறொரு தேதிக்கு ஒத்திவைக்க மறுத்துவிட்டார். இருதரப்பு கோரிக்கைகளையும் பரிசீலித்து, வழக்கு விசாரணையை அன்றைய தினத்தின் பிற்பகல் நேரத்திற்கு ஒத்திவைத்து உத்தரவிட்டார். பிற்பகல் விசாரணை தொடங்கும் போது காணொலி மூலம் ஆஜராவதற்கான இணையதள முகவரி சமர்ப்பிக்கப்படுமா அல்லது வழக்கை சமரச மையத்திற்கு அனுப்புவது குறித்து முடிவெடுக்கப்படுமா என்ற எதிர்பார்ப்பு எழுந்துள்ளது.