தமிழறிஞரின் மகனுக்கு இந்த நிலையா?… இறுதிச்சடங்கிற்கே பணமில்லாமல் தவிக்கும் குடும்பம்… மறைமலை அடிகள் மகனின் பரிதாப முடிவு… சோகத்தில் ஆழ்ந்த குடும்பம்…!!

தனித்தமிழ் இயக்கத்தின் தந்தை எனப் போற்றப்படும் மாபெரும் தமிழறிஞர் மறைமலை அடிகளின் மகன் மறை. பச்சையப்பன், உடல்நலக் குறைவு காரணமாக இன்று உயிரிழந்தார். சென்னை ராயப்பேட்டையில் உள்ள அரசு மருத்துவமனையில் எலும்பு சார்ந்த நோய்க்காக அனுமதிக்கப்பட்டு, தீவிர சிகிச்சை பெற்று வந்த நிலையில் அவரது உயிர் பிரிந்தது.

வரலாற்றுச் சிறப்புமிக்க ஒரு தமிழறிஞரின் மகனாக இருந்தபோதும், கடுமையான வறுமையின் காரணமாகவே அவர் அரசு மருத்துவமனையை நாடும் சூழல் ஏற்பட்டது. மேம்பட்ட மருத்துவச் சிகிச்சைக்குப் போதிய பணவசதி இல்லாத நிலையில் போராடி வந்த அவரை, அவரது மகள் லலிதாவும், மகன் சிவகுமாரும் உடன் தங்கிப் பராமரித்து வந்தனர்.

ஏற்கனவே அவரது மருத்துவச் செலவுகளுக்கு உதவி கோரியிருந்த நிலையில், தற்போது அவரது உயிரிழப்பு அக்குடும்பத்தை மேலும் சோகத்தில் ஆழ்த்தியுள்ளது. மறை. பச்சையப்பனின் இறுதிச் சடங்குகளைச் செய்வதற்குக்கூட கையில் பணமின்றி அவரது குடும்பத்தினர் தவித்து வருவதால், தமிழக அரசு உடனடியாகத் தலையிட்டுத் தேவையான பொருளாதார உதவிகளைச் செய்து தர வேண்டும் என்று அவர்கள் உருக்கமான கோரிக்கையை முன்வைத்துள்ளனர்.