ஒரே நாளில் மாறிய அரசியல் கணக்கு… தவெக-வில் குவியும் மாஜி அமைச்சர்கள்… மதுரையை கைப்பற்ற தவெக போட்ட ரகசிய ‘அசைன்மென்ட்’..!

தமிழகத்தில் உள்ளாட்சித் தேர்தல் நெருங்கி வரும் சூழலில், தென் மாவட்டங்களின் அரசியல் மையமான மதுரையில் மிக முக்கிய அரசியல் திருப்பங்கள் அரங்கேறத் தொடங்கியுள்ளன. நாடாளுமன்ற மற்றும் சட்டமன்றத் தேர்தல்களைத் தொடர்ந்து, உள்ளாட்சித் தேர்தலிலும் தங்களது பலத்தைக் காட்ட அனைத்து கட்சிகளும் வியூகம் வகுத்து வருகின்றன. இந்தச் சூழ்நிலையில், மதுரையில் அதிமுகவின் முக்கியப் புள்ளிகள் தமிழக வெற்றிக் கழகம் நோக்கிப் படையெடுக்கத் தொடங்கியுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. மதுரை மாநகராட்சி மற்றும் மாவட்ட அளவில் உள்ள அதிமுகவின் முன்னாள், இந்நாள் கவுன்சிலர்கள் மற்றும் மாவட்ட அளவிலான நிர்வாகிகள் பலரும் தவெக பக்கம் சாயத் தொடங்கி இருக்கின்றனர்.

உள்ளாட்சித் தேர்தலில் மதுரையை முழுமையாகக் கைப்பற்ற வேண்டும் என்ற இலக்குடன், அதிமுக நிர்வாகிகளை ‘கொத்தாக’ இழுத்து தவெக-வில் இணைக்கும் அசைன்மென்ட்டை அமைச்சர் சி.டி.ஆர். நிர்மல் குமார் கையில் எடுத்துள்ளார். இதற்காக மதுரையில் முகாமிட்டு ரகசிய பேச்சுவார்த்தைகளை நடத்தி வரும் அவர், தீவிரமாக காய் நகர்த்தி வருகிறார். இதன் தொடர்ச்சியாக, அதிமுக முன்னாள் அமைச்சர் விஜயபாஸ்கர் 24 ஒன்றியச் செயலாளர்கள், 8 நகரச் செயலாளர்கள் மற்றும் மாவட்ட அளவிலான 40 நிர்வாகிகளுடன் தவெகவில் இணைய இருப்பதாகத் தகவல்கள் வெளியாகியுள்ளன. மேலும், அழகிரியின் மகள் கயல்விழி தவெகவில் இணைய காய் நகர்த்தி வரும் வேளையில், அதிமுகவின் மன்னன் மற்றும் எஸ்ஸார் கோபி உள்ளிட்ட முக்கியப் புள்ளிகளும் பெரும் தொண்டர் பலத்துடன் தவெக பக்கம் வரப்போவதாகப் பேச்சுகள் பலமாக எழுந்துள்ளன.

அதிமுகவினர் பெருமளவில் தவெக-வில் இணையத் தொடங்கியுள்ளது கட்சிக்கு ஒருபுறம் பல சேர்க்கிறது என்றாலும், மறுபுறம் தவெக-வுக்குள்ளேயே மிகப்பெரிய சலசலப்பையும் கோஷ்டி பூசலையும் ஏற்படுத்தியுள்ளது. ஆரம்பம் முதலே கட்சிக்காக உழைத்த தவெக-வின் மூத்த மற்றும் உள்ளூர் நிர்வாகிகள், மாற்றுக்கட்சியிலிருந்து கொத்தாக வருபவர்களுக்கு முக்கியத்துவம் தரப்படுவதைக் கண்டு கடும் அதிர்ச்சியடைந்துள்ளனர். உள்ளாட்சித் தேர்தலில் தங்களுக்கு கிடைக்க வேண்டிய கவுன்சிலர் மற்றும் முக்கியப் பதவிகளுக்கான வாய்ப்புகளை, இந்த புதிய வரவுகள் தட்டிப்பறித்து விடுவார்களோ என்ற அச்சமும் தவெகவின் பழைய நிர்வாகிகளிடம் பரவலாக எழுந்துள்ளது.

அதற்கேற்றாற்போல், தவெகவின் மாவட்டச் செயலாளர்கள் சிலர் கவுன்சிலர் சீட்டுக்கு இப்போதே ரூ.15 லட்சம் என்ற அளவில் கல்லா கட்டத் தொடங்கி இருப்பதாகக் கூறப்படும் குற்றச்சாட்டுகள் எரியும் நெருப்பில் எண்ணெய்யை ஊற்றியுள்ளது. அதிமுகவினரின் இந்த அதிரடித் தாவலால், மதுரையில் தவெக-விற்குள்ளேயே தற்போது புதிய உட்கட்சிப் பூசல் பகிரங்கமாக வெடிக்கத் தொடங்கியுள்ளது. உள்ளாட்சித் தேர்தலுக்கு முன்பாகவே எழுந்துள்ள இந்த கோஷ்டி மோதல்களை தவெக தலைமை எவ்வாறு கையாண்டு சரி செய்யப் போகிறது என்பதைப் பொறுத்தே மதுரையில் அக்கட்சியின் வெற்றி வாய்ப்பு அமையும் என அரசியல் விமர்சகர்கள் கருதுகின்றனர்.