“எனக்கு 57.. உனக்கு 37″…. 4வது மனைவியாக நினைத்த பெண்ணால் வந்த வினை…. கோவையில் லாரி அதிபர் செய்த பயங்கரம்….!

கோயம்புத்தூர் மாவட்டம் சூலூர் அருகே உள்ள கண்ணம்பாளையத்தில் நடைபெற்ற ஒரு அதிர்ச்சிகரமான கொலைச் சம்பவம் பெரும் பரபரப்பை ஏற்படுத்தியுள்ளது. லாரி உரிமையாளரான 58 வயது பிரேம் ஆனந்த் என்பவர், தனது நான்காவது காதலியை அபகரித்துக் கொண்டதாகக் கருதி, ஓட்டல் அதிபர் திலீபன் என்பவரைக் கொடூரமாகக் கொலை செய்துள்ளார். ஏற்கனவே மூன்று திருமணங்கள் செய்திருந்த பிரேம் ஆனந்தின் வாழ்வில் ஏற்பட்ட தொடர் ஏமாற்றங்களே இந்தத் துயரத்திற்கு அடிப்படையாக அமைந்துள்ளது.

பிரேம் ஆனந்தின் கடந்த கால திருமண வாழ்க்கை மிகவும் சிக்கலானது. இவரது முதல் மனைவி இறந்துவிட்ட நிலையில், இரண்டாவது மனைவி விவாகரத்து பெற்றுச் சென்றுவிட்டார். அதன் பிறகு மூன்றாவது திருமணம் செய்துகொண்ட பெண், சில மாதங்களிலேயே வேறொரு நபருடன் ஓடிப்போயுள்ளார். இதனால் தனிமையில் இருந்த பிரேம் ஆனந்திற்கு, தனது வீட்டின் அருகே வசித்த 37 வயது பெண்ணுடன் பழக்கம் ஏற்பட்டுள்ளது. அந்தப் பெண்ணை நான்காவதாகத் திருமணம் செய்ய அவர் விரும்பிய நிலையில், அந்தப் பெண் அதற்கு மறுப்பு தெரிவித்துவிட்டு, திலீபனின் ஓட்டலில் வேலைக்குச் சேர்ந்துள்ளார்.

திலீபனுடன் அந்தப் பெண் கள்ளக்காதலில் இருப்பதாகச் சந்தேகமடைந்த பிரேம் ஆனந்த், கடந்த ஜனவரி மாதமே அந்தப் பெண்ணையும் திலீபனையும் தாக்க முயன்று சிறை சென்றுள்ளார். ஜாமீனில் வெளியே வந்த பிறகும் ஆத்திரம் குறையாத அவர், மீண்டும் திலீபனின் வீட்டிற்குச் சென்றுள்ளார். அங்கு திலீபன் கட்டிலில் படுத்திருப்பதைக்கண்டு ஆத்திரத்தின் உச்சத்துக்கே சென்ற பிரேம் ஆனந்த், கத்தியால் திலீபனின் கழுத்தை அறுத்துச் சாய்த்தார். தடுக்க முயன்ற பெண்ணையும் அவர் சரமாரியாகக் குத்தியுள்ளார்.

கொலை செய்த பிறகு, “எனக்குக் கிடைக்காத காதலி யாருக்கும் கிடைக்கக் கூடாது” என்ற நோக்கில், தானும் அந்தப் பெண்ணும் ஒன்றாகச் சாகலாம் என முடிவெடுத்து சமையல் எரிவாயு சிலிண்டரைத் திறந்துவிட்டுத் தீ வைத்துள்ளார். ஆனால், தீ எரிவதைக் கண்டு ஓடிவந்த அக்கம்பக்கத்தினர் தீயை அணைத்து அந்தப் பெண்ணைக் காப்பாற்றியதுடன், பிரேம் ஆனந்தைப் பிடித்துப் போலீசாரிடம் ஒப்படைத்தனர். தற்போது இந்தக் கொலைச் சம்பவம் தொடர்பாகப் போலீசார் வழக்குப் பதிவு செய்து தீவிர விசாரணை நடத்தி வருகின்றனர்.