“அம்மா எந்திரிம்மா”…. தாயின் ரத்த வெள்ளத்தில் ஒன்றரை வயது குழந்தை… வயல்வெளியில் கதறிய பிஞ்சு… நெஞ்சை பிழியும் சோக சம்பவம்….!

கர்நாடக மாநிலம் ராய்ச்சூர் மாவட்டம் சிந்தனூர் அருகே 25 வயது பெண் கொடூரமாகத் தாக்கப்பட்டு உயிரிழந்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. ஆர்.ஹெச். முகாம் பகுதியில் உள்ள வயல்வெளியில் பலத்த காயங்களுடன் உயிருக்குப் போராடிக்கொண்டிருந்த சினேகா என்ற அந்தப் பெண்ணின் அருகே, அவரது ஒன்றரை வயது பெண் குழந்தை தாயைப் பற்றிக்கொண்டு கதறி அழுதுகொண்டிருந்த காட்சி அப்பகுதி மக்களைக் கண்கலங்கச் செய்துள்ளது.

இச்சம்பவம் குறித்துத் தகவலறிந்து உடனடியாக விரைந்து வந்த சிந்தனூர் ஊரகக் காவல் துறையினர், உயிருக்குப் போராடிக்கொண்டிருந்த சினேகாவை மீட்டு சிந்தனூர் தாலுகா அரசு மருத்துவமனைக்குச் சிகிச்சைக்காக அனுப்பி வைத்தனர். இருப்பினும், தீவிரக் காயங்கள் காரணமாக அவர் சிகிச்சை பலனின்றி பரிதாபமாக உயிரிழந்தார். இதையடுத்து, அவரது உடல் பிரேதப் பரிசோதனைக்கு அனுப்பப்பட்டு காவல் துறையினர் முதற்கட்ட விசாரணையைத் தொடங்கினர்.

காவல்துறையின் முதற்கட்ட விசாரணையில், சினேகாவிற்கும் அமித் என்பவருக்கும் கடந்த நான்கு ஆண்டுகளுக்கு முன்பு திருமணமாகி ஒரு குழந்தை இருப்பது தெரியவந்துள்ளது. இந்த நிலையில், கடந்த நான்கு மாதங்களாகச் சினேகாவிற்கு ஷுபம் என்பவருடன் திருமணத்திற்குப் புறம்பான உறவு இருந்து வந்ததாகக் கூறப்படுகிறது. இந்த உறவு தொடர்பாக ஏற்பட்ட தகராறு அல்லது மோதலே இந்த கொடூரக் கொலைக்குக் காரணமாக இருக்கலாம் என்ற கோணத்தில் போலீசார் விசாரணை நடத்தி வருகின்றனர்.

இக்கொடூர சம்பவம் தொடர்பாகச் சினேகாவின் கணவர் அமித் மற்றும் அவருடன் தொடர்பில் இருந்ததாகக் கூறப்படும் ஷுபம் ஆகிய இருவரையும் காவல் துறையினர் கைது செய்து தீவிர விசாரணை நடத்தி வருகின்றனர். சினேகா எந்தச் சூழ்நிலையில் தாக்கப்பட்டார், தாக்குதலுக்குப் பயன்படுத்தப்பட்ட பொருள் என்ன மற்றும் சம்பவ இடத்திற்கு குழந்தை எப்படி வந்தது என்பது குறித்துத் தடயங்களைச் சேகரித்து வரும் போலீசார், பிரேதப் பரிசோதனை அறிக்கை வந்த பிறகே கொலையின் முழு பின்னணியும் தெளிவாகும் எனத் தெரிவித்துள்ளனர்.