திருப்பூர் லாட்ஜில் பெண்கள்… வாட்ஸ்அப்பில் வந்த போட்டோ.. ஆசைப்பட்டுச் சென்ற இளைஞருக்குக் காத்திருந்த பேரதிர்ச்சி…!

திருப்பூர் மேட்டுப்பாளையம் பகுதியில் பெண்களின் புகைப்படங்களைக் காட்டி, ஆன்லைன் மூலமாகப் பண மோசடியில் ஈடுபட்டு வந்த 4 பேர் கொண்ட கும்பலை போலீசார் அதிரடியாகக் கைது செய்துள்ளனர். திருப்பூரைச் சேர்ந்த பின்னலாடை நிறுவனத் தொழிலாளி ஒருவர் அளித்த புகாரின் பேரில் இந்த நடவடிக்கை எடுக்கப்பட்டுள்ளது. கைது செய்யப்பட்டவர்களிடமிருந்து மோசடிக்கு பயன்படுத்தப்பட்ட ஏராளமான செல்போன்கள் மற்றும் சிம் கார்டுகளை போலீசார் பறிமுதல் செய்துள்ளனர்.

பாதிக்கப்பட்ட 28 வயது இளைஞரின் மொபைல் எண்ணிற்கு, திருப்பூரில் உள்ள சில லாட்ஜ்களில் பெண்கள் தங்கியிருப்பதாகவும், ஆன்லைனில் பணம் செலுத்தினால் அவர்களைச் சந்திக்க ஏற்பாடு செய்வதாகவும் ஒரு குறுஞ்செய்தி (Message) வந்துள்ளது. அதை நம்பி அவர் அந்த எண்ணைத் தொடர்பு கொண்டபோது, மறுமுனையில் பேசிய நபர் சில பெண்களின் புகைப்படங்களையும் விடுதிகளின் பெயர்களையும் வாட்ஸ்அப்பில் அனுப்பியுள்ளார். பின்னர், முன்பணமாக ₹4,000-ஐ ஒரு கியூஆர் கோடு (QR Code) மூலம் செலுத்துமாறு கூற, அந்த இளைஞரும் பணத்தை அனுப்பியுள்ளார்.

கூடுதல் தொகையாக மேலும் ₹2,000 கேட்கப்பட்டபோது, தான் ஏமாற்றப்படுவதை உணர்ந்த வாலிபர் மேற்கொண்டு பணம் அனுப்ப மறுத்து திருப்பூர் வடக்கு காவல் நிலையத்தில் புகார் அளித்தார். இதன் பேரில் வழக்குப்பதிவு செய்த போலீசார், செல்போன் டவர் லொகேஷன் மற்றும் வங்கி கணக்குகளைக் கண்காணித்து உடுமலைப்பேட்டையைச் சேர்ந்த வெற்றிவேல் (41), சக்தி விக்னேஸ்வரன் (24) மற்றும் பொள்ளாச்சியைச் சேர்ந்த கோகுல்குமார் (35), அருண் பிரசாத் (26) ஆகிய 4 பேரைக் கைது செய்தனர். இவர்களில் கோகுல்குமார் ஒரு பொறியியல் பட்டதாரி என்பது குறிப்பிடத்தக்கது.

கைதான 4 பேரும் போலி சமூக ஊடகக் கணக்குகள் மூலம் திட்டமிட்டு பலரிடம் இதே பாணியில் லட்சக்கணக்கில் மோசடி செய்ததை ஒப்புக்கொண்டனர். தமிழகம் முழுவதும் கியூஆர் கோடு மற்றும் குறுஞ்செய்திகள் மூலம் இதுபோன்ற ஆன்லைன் மோசடிகள் அதிகரித்து வருவதால், பொதுமக்கள் தங்களுக்கு வரும் தேவையற்ற லிங்க்குகளையோ, ஆசை வார்த்தைகளையோ நம்பி பணத்தை அனுப்பி ஏமாற வேண்டாம் என்றும், விழிப்புணர்வுடன் இருந்து உடனடியாக போலீசாரிடம் புகார் அளிக்க வேண்டும் என்றும் காவல்துறை எச்சரித்துள்ளது.