வெறும் ₹200 கடனுக்காக இப்படியா?.. “டீ வேணும்னா முதல்ல அந்த காசைக் கொடு”.. டீக்கடை உரிமையாளர் அடித்துக் கொலை… பெங்களூருவில் பரபரப்பு..!!!

பெங்களூரு புறநகர் மாவட்டம் தொட்டபள்ளாப்புரா தாலுகா தியாவசந்திரா கிராமத்தைச் சேர்ந்தவர் மஞ்சுநாத் (40). இவர் அப்பகாரனஹள்ளி கேட் பகுதியில் டீக்கடை நடத்தி வந்துள்ளார். இவரது கடைக்கு அதே கிராமத்தைச் சேர்ந்த தொழிலாளியான முனியப்பா என்பவர் அடிக்கடி வந்து கடனுக்கு டீ குடித்துச் செல்வதை வழக்கமாகக் கொண்டிருந்தார். கடந்த 12-ஆம் தேதி முனியப்பா மீண்டும் மஞ்சுநாத்தின் கடைக்கு வந்து டீ கேட்டுள்ளார். அப்போது மஞ்சுநாத், ஏற்கனவே குடித்த டீக்காக ₹200 கடன் பாக்கி வைத்திருப்பதாகவும், முதலில் அந்த ₹200-ஐத் திருப்பித் தருமாறும் கேட்டுள்ளார்.

இதனால் இருவருக்கும் இடையே கடுமையான வாக்குவாதம் ஏற்பட்டுள்ளது. வாக்குவாதம் முற்றவே ஆத்திரமடைந்த முனியப்பா, அங்கிருந்த உருட்டுக்கட்டையை எடுத்து மஞ்சுநாத்தைத் தலை மற்றும் மார்புப் பகுதிகளில் சரமாரியாகத் தாக்கியுள்ளார். இதில் பலத்த காயமடைந்த மஞ்சுநாத் உடனடியாகத் தொட்டபள்ளாப்புராவில் உள்ள மருத்துவமனையில் அனுமதிக்கப்பட்டு தீவிர சிகிச்சை பெற்று வந்தார். எனினும், சிகிச்சை பலனின்றி நேற்று முன்தினம் இரவு அவர் பரிதாபமாக உயிரிழந்தார்.

மஞ்சுநாத்தின் மரணத்தைத் தொடர்ந்து, தலைமறைவாக இருந்த முனியப்பாவை தொட்டபெலவங்களா போலீசார் தீவிர தேடுதல் வேட்டைக்குப் பின் கைது செய்தனர். போலீசாரின் முதற்கட்ட விசாரணையில், வெறும் ₹200 கடனைத் திரும்பக் கேட்ட காரணத்திற்காகவே இந்தத் துணிகரக் கொலை அரங்கேறியுள்ளது உறுதியானது. மேலும், கைது செய்யப்பட்ட முனியப்பா ஏற்கனவே தனது சொந்தத் தாயைக் கத்தியால் குத்திக் கொலை செய்ய முயன்ற வழக்கில் சிறை சென்று, சமீபத்தில்தான் வெளியே வந்துள்ளார் என்பதும், தற்போது டீக்கடை உரிமையாளரைக் கொலை செய்துள்ளார் என்பதும் தெரியவந்துள்ளது.