நள்ளிரவில் 12.30 மணிக்கு பூஜை அறையில் கேட்ட சத்தம்… 9-வது மாடியில் இருந்து குதித்த 3 சிறுமிகள்…. ‘கொரிய இளவரசிகளாக’ நினைத்துக் கொண்ட சிறுமிகளுக்கு நேர்ந்த சோகம்….!

உத்தரப்பிரதேச மாநிலம் காசியாபாத்தில் உள்ள பாரத் சிட்டி குடியிருப்பில், ஒரே குடும்பத்தைச் சேர்ந்த மூன்று சகோதரிகள் ஒன்பதாவது மாடியில் இருந்து குதித்து தற்கொலை செய்து கொண்ட சம்பவம் பெரும் அதிர்ச்சியை ஏற்படுத்தியுள்ளது. 16, 14 மற்றும் 12 வயதுடைய அந்த சிறுமிகள், கொரிய ஆன்லைன் மொபைல் விளையாட்டுக்குத் தீவிரமாக அடிமையாகி இருந்ததே இந்த விபரீத முடிவுக்குக் காரணம் என்று முதற்கட்ட விசாரணையில் தெரியவந்துள்ளது.

இந்தச் சிறுமிகள் கொரிய கலாச்சாரம் மற்றும் அந்த விளையாட்டின் தாக்கத்தால் தங்களை இந்தியர்கள் என்று கருதாமல், ‘கொரிய இளவரசிகள்’ என்று கற்பனை செய்து கொண்டு வாழ்ந்து வந்துள்ளனர். மொபைல் விளையாட்டிலேயே மூழ்கிக் கிடந்ததால் அவர்கள் படிப்பிலும் கவனம் செலுத்தவில்லை. 16 வயதான மூத்த சிறுமி இன்னும் 4-ஆம் வகுப்பிலேயே படித்துக் கொண்டிருந்தார் என்பது இவர்களது அடிமைத்தனம் எந்த அளவிற்கு இருந்தது என்பதைக் காட்டுகிறது.

புதன்கிழமை அதிகாலை 12:30 மணியளவில், வீட்டில் இருந்த பூஜை அறைக்குச் சென்று கதவைத் தாழிட்டுக் கொண்ட சிறுமிகள், அங்கிருந்த ஜன்னல் வழியாக ஒருவருக்குப் பின் ஒருவராகக் கீழே குதித்துள்ளனர். பலத்த சத்தம் கேட்டு ஓடி வந்த பாதுகாவலர்களும் அக்கம்பக்கத்தினரும் பார்த்தபோது, அவர்கள் மூவரும் சம்பவ இடத்திலேயே உயிரிழந்திருந்தனர். அவர்களது கைபேசிகளைப் பறித்து விளையாடக் கூடாது என்று பெற்றோர் கண்டித்ததே இவர்களை இந்த விபரீத முடிவை எடுக்கத் தூண்டியதாகக் கூறப்படுகிறது.

சிறுமிகள் விட்டுச் சென்ற நாட்குறிப்பில், தாங்கள் கொரியர்களாக மாற விரும்புவதாகவும், விளையாட்டில் உள்ள பணிகளை (tasks) முடிக்க விரும்புவதாகவும் உருக்கமான குறிப்புகளை எழுதியுள்ளனர். கோவிட்-19 பெருந்தொற்றுக்குப் பிறகு ஆன்லைன் விளையாட்டுகளுக்குக் குழந்தைகள் அடிமையாவது அதிகரித்து வருவதையும், அது அவர்களின் மனநலத்தை எந்த அளவிற்குப் பாதிக்கிறது என்பதையும் இந்தத் துயரச் சம்பவம் ஒரு எச்சரிக்கையாக அமைந்துள்ளது.