மகளையே தொடர் பாலியல் வன்கொடுமை செய்த தந்தை… நெஞ்சை உலுக்கும் நெல்லை சம்பவம் – 29 நாட்களில் கிடைத்த அதிரடித் தீர்ப்பு…!

நெல்லை அருகே 11 வயது வளர்ப்பு மகளைப் பாலியல் வன்கொடுமை செய்த தந்தைக்கு, வழக்குப்பதிவு செய்யப்பட்ட 29 நாட்களிலேயே சாகும் வரை ஆயுள் தண்டனை விதித்து நெல்லை போக்சோ சிறப்பு நீதிமன்றம் வரலாற்றுச் சிறப்புமிக்க தீர்ப்பை வழங்கியுள்ளது. நாங்குநேரி பகுதியைச் சேர்ந்த 35 வயது எலக்ட்ரீசியன் ஒருவர், தனது இரண்டாவது மனைவியின் மகளைத் தொடர்ந்து பாலியல் ரீதியாகத் துன்புறுத்தி வந்துள்ளார். கணவனின் செல்போனில் இருந்த ஆட்டோமேட்டிக் கால் ரெக்கார்டிங் மூலம் அவர் மகளிடம் ஆபாசமாகப் பேசியதை அறிந்த தாய், இதுகுறித்து மகளிடம் விசாரித்தபோதுதான் அந்தச் சிறுமிக்கு இழைக்கப்பட்ட கொடுமைகள் வெளிச்சத்திற்கு வந்தன.

இதையடுத்து கடந்த மாதம் 12-ஆம் தேதி அளிக்கப்பட்ட புகாரின் பேரில், நாங்குநேரி அனைத்து மகளிர் போலீஸார் போக்சோ சட்டத்தின்கீழ் வழக்குப் பதிவு செய்து அந்த நபரைக் கைது செய்தனர். மாவட்ட எஸ்பி பிரசண்ண குமார் ஆலோசனையின் பேரில், ஏடிஎஸ்பி சண்முகம் மற்றும் டிஎஸ்பி தர்ஷிகா நடராஜன் தலைமையிலான குழுவினர் விசாரணையை மின்னல் வேகத்தில் முடுக்கிவிட்டனர். வெறும் 18 நாட்களில் குற்றப்பத்திரிகை தாக்கல் செய்யப்பட்டதோடு, விசாரணையின்போது 5 வேலை நாட்களில் 23 சாட்சிகளிடம் முழுமையாக விசாரணை நடத்தி முடிக்கப்பட்டது. தமிழகத்திலேயே மிகக் குறுகிய காலத்தில் இறுதி விசாரணைக்கு வந்த வழக்குகளில் ஒன்றாக இது கவனத்தைப் பெற்றது.

வழக்கை விசாரித்த நீதிபதி சுரேஷ்குமார், குற்றம் சாட்டப்பட்ட நபர் மீது வைக்கப்பட்ட புகார்கள் ஆதாரங்களுடன் நிரூபிக்கப்பட்டதால், அவருக்குப் போக்சோ சட்டத்தின் கீழ் சாகும் வரை சிறையில் இருக்கும் வகையில் ஆயுள் தண்டனை வழங்கி உத்தரவிட்டார். மேலும், பாலியல் சீண்டல் மற்றும் மிரட்டல் விடுத்த குற்றங்களுக்காகத் தனித்தனியே சிறைத் தண்டனைகளும், மொத்தம் 28 ஆயிரம் ரூபாய் அபராதமும் விதிக்கப்பட்டது. பாதிக்கப்பட்ட சிறுமிக்குத் தமிழக அரசு சார்பில் 7 லட்சம் ரூபாய் இழப்பீடு வழங்கவும், அந்தத் தொகை சிறுமிக்கு 18 வயது பூர்த்தியாகும் வரை வங்கியில் டெபாசிட் செய்யவும் நீதிபதி உத்தரவிட்டார்.

சட்ட நடைமுறைகளைச் சரியாகப் பின்பற்றி, காவல்துறை மற்றும் நீதிமன்றம் ஒருங்கிணைந்து செயல்பட்டால் நீதியை விரைவாகப் பெற்றுத்தர முடியும் என்பதற்கு இந்த வழக்கு ஒரு சிறந்த உதாரணமாக அமைந்துள்ளது. கடந்த மூன்று ஆண்டுகளில் ஒரு மாதத்திற்குள் தீர்ப்பு வழங்கப்பட்ட முதல் வழக்கு இதுவென அரசு வழக்கறிஞர் உஷா பெருமிதத்துடன் தெரிவித்தார். குற்றவாளிக்குக் கடுமையான தண்டனையை விரைவாகப் பெற்றுத் தந்த காவல் துறையினரை உயர் அதிகாரிகள் மற்றும் சமூக ஆர்வலர்கள் பாராட்டி வருகின்றனர்.