“போதும் இந்த ரத்த ஆறு”… இஸ்ரேலிடம் கெஞ்சும் நாடுகள்… டிரம்ப் செய்த போன் கால்… அதிர வைக்கும் தற்போதைய நிலவரம்….!

மத்திய கிழக்கில் நிலவி வரும் போர் பதற்றத்தைத் தணிக்க சர்வதேச அளவில் தீவிர முயற்சிகள் மேற்கொள்ளப்பட்டு வருகின்றன. ஒருபுறம் ஈரானுடன் போர் நிறுத்தத்தை உறுதி செய்ய பாகிஸ்தானில் முக்கியப் பேச்சுவார்த்தைகள் நடந்து வரும் நிலையில், மறுபுறம் லெபனான் மீது இஸ்ரேல் நடத்தி வரும் தீவிரத் தாக்குதல்களை நிறுத்த அமெரிக்கா அழுத்தம் கொடுத்து வருகிறது. லெபனான் மீதான தாக்குதல் தொடர்ந்தால், பாகிஸ்தானில் நடைபெறும் அமைதிப் பேச்சுவார்த்தையில் எவ்வித முன்னேற்றமும் ஏற்படாது என ஈரான் நிபந்தனை விதித்துள்ளது இந்தப் போர்ச் சூழலை மேலும் சிக்கலாக்கியுள்ளது.

லெபனான் அரசின் புள்ளிவிவரங்களின்படி, ஹிஸ்புல்லா அமைப்பினரை இலக்கு வைத்து இஸ்ரேல் நடத்திய தாக்குதல்களில் இதுவரையில் சுமார் 2,000 பேர் உயிரிழந்துள்ளனர் மற்றும் 6,300-க்கும் மேற்பட்டோர் காயமடைந்துள்ளனர். குறிப்பாக, ஈரான் போர் நிறுத்த அறிவிப்புக்குப் பிந்தைய ஒருநாளில் மட்டும் 357 பேர் கொல்லப்பட்டது அதிர்ச்சியை ஏற்படுத்தியுள்ளது. இந்த உயிரிழப்புகளைத் தடுக்கவும், அமைதியை நிலைநாட்டவும் அமெரிக்கா மற்றும் லெபனான் ஆகிய நாடுகள் இஸ்ரேலிடம் தற்காலிகப் போர் நிறுத்தத்தைக் கோரியுள்ளன.

இந்த இக்கட்டான சூழலில், வாஷிங்டனில் உள்ள தூதரகங்கள் வழியாக லெபனானும் இஸ்ரேலும் அரிதான ஒரு நேரடித் தொலைபேசி உரையாடலை வெள்ளிக்கிழமை நடத்தின. இதன் தொடர்ச்சியாக, ஏப்ரல் 14-ஆம் தேதி செவ்வாய்க்கிழமை வாஷிங்டனில் அமெரிக்க வெளியுறவுத் துறை அதிகாரிகள் முன்னிலையில் இரு நாடுகளும் நேருக்கு நேர் பேச்சுவார்த்தை நடத்த ஒப்புக்கொண்டுள்ளன. இந்தச் சந்திப்புக்கு முன்னதாக ஒரு ‘நல்லெண்ண அடையாளமாக’ இஸ்ரேல் தாக்குதல்களை நிறுத்த வேண்டும் என லெபனான் விடுத்த கோரிக்கையை அமெரிக்காவும் ஆதரித்துள்ளது.

இருப்பினும், இஸ்ரேல் பிரதமர் பெஞ்சமின் நெதன்யாகு இது குறித்து இன்னும் இறுதி முடிவை அறிவிக்கவில்லை. இஸ்ரேல் தூதர் யெச்சியெல் லைட்டர், லெபனான் அரசுடன் அமைதி உடன்படிக்கைக்குத் தயார் என்றும், ஆனால் ஹிஸ்புல்லாவுடன் போர் நிறுத்தம் என்ற பேச்சுக்கே இடமில்லை என்றும் திட்டவட்டமாகத் தெரிவித்துள்ளார். ஈரானுடனான உடன்படிக்கையில் லெபனான் விவகாரம் சேர்க்கப்படவில்லை என அமெரிக்கா கூறினாலும், ஈரான் அதனை ஏற்க மறுத்து வருவதால் மத்திய கிழக்கில் முழுமையான அமைதி திரும்புமா என்பது வரும் செவ்வாய்க்கிழமை நடைபெறும் பேச்சுவார்த்தையிலேயே தெரியும்.