“எனக்கு கேக் எல்லாம் வெட்ட வேண்டாம்” வாயு கசிவு விபத்தினால் பிறந்தநாள் கேக்கை திருப்பி அனுப்பிய முதல்வர் விஜய்..!!

தமிழ்நாடு முதலமைச்சர் தளபதி விஜய் அவர்களின் பிறந்தநாளை முன்னிட்டு, தமிழ்நாடு முழுவதும் பல்வேறு இடங்களில் அன்னதான நிகழ்ச்சிகள், ரத்ததான முகாம்கள், கேக் வெட்டி கொண்டாட்டங்கள் மற்றும் வாண வேடிக்கை உள்ளிட்டவை அவரது ரசிகர்களாலும் கட்சி நிர்வாகிகளாலும் விமரிசையாக நடத்தப்பட்டு வருகின்றன. இந்நிலையில், முதல்வரின் பிறந்தநாள் கொண்டாட்டத்திற்காகத் தலைமைச் செயலகத்திற்குச் சிறப்பு கேக் ஒன்று வரவழைக்கப்பட்டிருந்தது. ஆனால், திருவள்ளூர் மாவட்டத்தில் ஏற்பட்ட அம்மோனியா வாயு கசிவு விபத்தின் தீவிரத்தைக் கருத்தில்கொண்டு, “தற்போது கேக் வெட்டும் கொண்டாட்டங்கள் எதுவும் வேண்டாம்” எனக் கூறி, முதல்வர் தரப்பிலிருந்து அந்த கேக் திருப்பி அனுப்பப்பட்டதாகத் தகவல்கள் வெளியாகியுள்ளன.

திருவள்ளூர் மாவட்டம் பெரியபாளையத்தை அடுத்த கன்னிகைப் பேர் பகுதியில் செயல்பட்டு வரும் தனியார் இறால் பதப்படுத்தும் தொழிற்சாலையில் ஏற்பட்ட இந்த திடீர் அம்மோனியா வாயு கசிவு விபத்தில், மொத்தம் 74 தொழிலாளர்கள் கடுமையான மூச்சுத்திணறல் மற்றும் உடல்நலக் குறைவால் பாதிக்கப்பட்டனர். இவர்களில் 67 பேர் இன்னும் பல்வேறு அரசு மற்றும் தனியார் மருத்துவமனைகளில் தீவிர சிகிச்சை பிரிவில் அனுமதிக்கப்பட்டுள்ளனர். இந்த கோர விபத்தில் சிக்கி ஏற்கனவே 5 பேர் உயிரிழந்திருந்த நிலையில், தற்போது சிகிச்சை பலனின்றி மேலும் ஒரு பெண் தொழிலாளி உயிரிழந்துள்ளார். இதனால் அம்மோனியா வாயு கசிவு விபத்தில் உயிரிழந்தவர்களின் ஒட்டுமொத்த எண்ணிக்கை 6-ஆக உயர்ந்துள்ளது அப்பகுதியில் பெரும் சோகத்தை ஏற்படுத்தியுள்ளது.