பகீர்.. மரணக் குவியலாக மாறிய லக்னோ கட்டிடம்… கொளுந்துவிட்டு எரிந்த தீயில் 14 உயிர்கள் சாம்பல்… நெஞ்சை உலுக்கும் சோகம்…!!

உத்தரப் பிரதேச மாநிலம் லக்னோவின் அலிகஞ்ச் காவல் நிலைய எல்லைக்குட்பட்ட புர்னியா பகுதியில் உள்ள ஒரு பல்லடுக்குக் கட்டிடத்தில் திங்கட்கிழமை அன்று பயங்கர தீ விபத்து ஏற்பட்டது. இந்தக் கட்டிடத்தின் தரைத் தளத்தில் இயங்கி வந்த ‘ஹெட் ஹாப்பர் 3D ஆர்ட் ஸ்டுடியோ’ என்ற கலைக்கூடத்தில் முதலில் பற்றிய தீ, மிக வேகமாக கட்டிடம் முழுவதும் பரவியது. இந்த துரதிர்ஷ்டவசமான கோர விபத்தில் சிக்கி இதுவரை 14 பேர் உயிரிழந்துள்ளனர், மேலும் பலர் படுகாயமடைந்துள்ளனர்.

தீ விபத்து ஏற்பட்ட சமயத்தில், கட்டிடத்தின் இரண்டாவது தளத்தில் செயல்பட்டு வந்த பயிற்சி மையத்தில் ஏராளமான மாணவ-மாணவிகள் மற்றும் பிற நபர்கள் இருந்தனர். கட்டிடம் முழுவதும் அடர்ந்த புகை சூழ்ந்ததால், உள்ளே சிக்கியவர்கள் தங்களைக் காப்பாற்றிக் கொள்ள ஜன்னல்கள் மற்றும் மேற்கூரைகளில் இருந்து கீழே குதித்தனர். தகவலறிந்து வந்த தீயணைப்புத் துறையின் 24 வாகனங்கள், தேசிய பேரிடர் மீட்புப் படை மற்றும் காவல்துறை இணைந்து கட்டிடத்தின் சுவர்களை உடைத்து தீவிர மீட்புப் பணிகளில் ஈடுபட்டனர். இதுவரை 11 பேர் பாதுகாப்பாக மீட்கப்பட்டுள்ள நிலையில், காயமடைந்தவர்கள் கே.ஜி.எம்.யூ மருத்துவமனையில் அனுமதிக்கப்பட்டு தீவிர சிகிச்சை பெற்று வருகின்றனர்.

இந்த பெரும் சோக சம்பவத்தை அடுத்து, உத்தரப் பிரதேச முதல்வர் யோகி ஆதித்யநாத் தனது அலிகார் பயணத்தை ரத்து செய்துவிட்டு உடனடியாக லக்னோ விரைந்தார். உயிரிழந்தவர்களின் குடும்பத்தினருக்குத் தனது ஆழ்ந்த இரங்கலைத் தெரிவித்துள்ள முதல்வர், பாதிக்கப்பட்டவர்களுக்குத் தேவையான அனைத்து உதவிகளையும் செய்யுமாறு அதிகாரிகளுக்கு உத்தரவிட்டுள்ளார். மாநில துணை முதல்வர் பிரஜேஷ் பதக் மற்றும் பல உயர் அதிகாரிகள் சம்பவ இடத்திற்கு நேரில் சென்று மீட்புப் பணிகளை ஆய்வு செய்துள்ளனர். இந்த தீ விபத்துக்கான துல்லியமான காரணம் குறித்து அதிகாரிகள் தொடர்ந்து விசாரணை நடத்தி வருகின்றனர்.