“99% முடிவு எடுத்தாச்சு.. பணிந்து போ இல்லையெனில் தரைமட்டம்”… ஈரானுக்கு டிரம்ப் கொடுத்த கடைசி எச்சரிக்கை… உலகையே அதிரவைத்த அந்த அறிவிப்பு…!

அமெரிக்க அதிபர் டொனால்ட் டிரம்ப், ஈரானின் ஒத்துழைப்பு இருந்தாலும் இல்லாவிட்டாலும் உலகின் மிக முக்கியமான கடல் வணிகப் பாதையான ‘ஹார்முஸ் ஜலசந்தி’ மிக விரைவில் திறக்கப்படும் என்று அதிரடியாகத் தெரிவித்துள்ளார். பாகிஸ்தானின் இஸ்லாமாபாத்தில் இரு நாடுகளுக்கும் இடையிலான அமைதி பேச்சுவார்த்தை தொடங்குவதற்குச் சில மணி நேரங்களுக்கு முன்னதாக இந்த எச்சரிக்கையை அவர் விடுத்துள்ளார். ஈரான் தனது பிடிவாதத்தைக் காட்டினால், ராணுவ நடவடிக்கை மூலமாவது இந்த ஜலசந்தி திறக்கப்படும் என்பதைத் தனது பேச்சின் மூலம் டிரம்ப் சூசகமாக உணர்த்தியுள்ளார்.

இந்த மோதலை முடிவுக்குக் கொண்டுவர அமெரிக்கத் துணை அதிபர் ஜே.டி.வான்ஸ் தலைமையிலான குழு ஈரான் அதிகாரிகளைச் சந்திக்க உள்ளது. இந்தப் பேச்சுவார்த்தையின் வெற்றி எதில் இருக்கிறது என்ற கேள்விக்கு, “ஈரான் அணு ஆயுதங்களை வைத்திருக்கக் கூடாது என்பதுதான் 99 சதவீத முக்கிய அம்சம்” என்று டிரம்ப் பதிலளித்துள்ளார். தற்போது அறிவிக்கப்பட்டுள்ள இரண்டு வார கால போர்நிறுத்தத்தைப் பயன்படுத்தி, ஒரு நிரந்தர அமைதி உடன்படிக்கையை ஏற்படுத்த அமெரிக்கா தீவிரமாக முயன்று வருகிறது.

பிப்ரவரி இறுதியில் தொடங்கிய இந்த மோதலால், உலகளாவிய கச்சா எண்ணெய் போக்குவரத்தில் ஐந்தில் ஒரு பங்கை கையாளும் ஹார்முஸ் ஜலசந்தியை ஈரான் முடக்கியுள்ளது. இதன் விளைவாக சர்வதேச சந்தையில் எண்ணெய் விலை கடுமையாக உயர்ந்துள்ளதோடு, உலகளாவிய பொருளாதார நிலையின்மையும் ஏற்பட்டுள்ளது. டிரம்ப்பின் இந்த அதிரடி எச்சரிக்கை, மத்திய கிழக்கு பிராந்தியத்தில் பதற்றத்தை மேலும் அதிகரித்துள்ள நிலையில், இஸ்லாமாபாத் பேச்சுவார்த்தையின் முடிவுகளை உலகம் உற்று நோக்கிக் கொண்டிருக்கிறது.