“என் பிள்ளையை இப்படி பண்ணிட்டாங்களே…” தாயின் கதறல்…! பள்ளி மாணவன் வாயில் பூச்சி மருந்து ஊற்றிய உறவினர்கள்… திருவள்ளூரில் கொடூரம்…!

திருவள்ளூர் மாவட்டம், அரும்பாக்கம் கிராமத்தைச் சேர்ந்த ஜோதி – ஜெயந்தி தம்பதியினரின் மகன் கௌதம், நிலத் தகராறு காரணமாகத் தனது சொந்த உறவினர்களாலேயே கொலை முயற்சிக்கு ஆளாக்கப்பட்ட சம்பவம் அதிர்ச்சியை ஏற்படுத்தியுள்ளது. கடந்த 7-ஆம் தேதி விவசாய நிலத்தில் மயங்கிக் கிடந்த 12-ஆம் வகுப்பு மாணவனை மீட்ட மக்கள், அவர் தற்கொலைக்கு முயன்றதாகக் கருதி மருத்துவமனையில் சேர்த்தனர்.

ஆனால், சிகிச்சை பெற்று வந்த மாணவன் கௌதம் சுயநினைவு திரும்பியதும், தனது தந்தை ஜோதியின் உறவினர்களான மோகன், பிச்சைமுத்து உள்ளிட்ட 6 பேர் தன்னைச் சூழ்ந்து கட்டாயப்படுத்தி வாயில் பூச்சி மருந்தை ஊற்றியதாகப் போலீசாரிடம் வாக்குமூலம் அளித்துள்ளார்.

தற்போது சென்னை ராஜீவ்காந்தி மருத்துவமனையில் உயிருக்குப் போராடி வரும் கௌதமின் தந்தைக்கும், அவரது உறவினர்களுக்கும் இடையே நீண்ட நாட்களாகச் சொத்துப் பிரச்சினை இருந்து வந்துள்ளது. இதன் காரணமாகவே மாணவனைத் தீர்த்துக்கட்ட உறவினர்கள் திட்டமிட்டுச் செயல்பட்டது விசாரணையில் உறுதியானது. இந்தச் சம்பவம் தொடர்பாகப் போலீசார் வழக்கை கொலை முயற்சியாக மாற்றிப் பதிவு செய்துள்ள நிலையில், சம்பந்தப்பட்ட நபர்களை விரைந்து கைது செய்யக் கோரி மாணவனின் தாயார் ஜெயந்தி டிஜிபி அலுவலகத்தில் புகார் அளித்துள்ளார்.