“அப்போ அப்படி.. இப்போ இப்படி.. அப்படியே தலைகீழா மாறிட்டாரே”.. இணையத்தை உலுக்கும் அமைச்சர் கீர்த்தனாவின் அந்த ‘சிரிப்பு’.. வறுத்தெடுக்கும் நெட்டிசன்கள்..!!

தமிழகத்தில் கடந்த சட்டமன்ற தேர்தல் பிரச்சாரத்தின் போது திமுக ஆட்சி காலத்தில் சட்டம் ஒழுங்கு சீர்கெட்டுள்ளதாகவும், பெண்கள் மற்றும் சிறுமிகளுக்குப் பாதுகாப்பு இல்லை என்றும் எதிர்க்கட்சிகள் கடுமையான விமர்சனங்களை முன்வைத்தன. குறிப்பாக, தற்போதைய முதலமைச்சர் ஜோசப் விஜய் தலைமையிலான தமிழக வெற்றிக் கழகம் (தவெக) பெண் பாதுகாப்பை வலியுறுத்தி அடுக்கடுக்கான கேள்விகளை எழுப்பியது. இந்நிலையில், தவெக ஆட்சி அமைந்த சில நாட்களிலேயே அடுத்தடுத்து கொலை, கற்பழிப்பு சம்பவங்கள் அரங்கேறி அதிர்ச்சியை ஏற்படுத்தின. அதிலும் குறிப்பாக, கோவையில் 10 வயது சிறுமி ஒருவர் பக்கத்து வீட்டில் வசிப்பவராலேயே பாலியல் வன்கொடுமை செய்யப்பட்டு கொடூரமாகக் கொலை செய்யப்பட்ட சம்பவம் நாடு முழுவதும் பெரும் அதிர்வலைகளை உருவாக்கியுள்ளது.

இந்தச் சம்பவம் குறித்து சிவகாசி தொகுதியில் இருந்து வெற்றி பெற்று தவெக அமைச்சரவையில் இடம்பெற்றுள்ள பெண் அமைச்சர் எஸ். கீர்த்தனாவிடம் செய்தியாளர்கள் கேள்வி எழுப்பினர். அதற்கு அவர், “தலைவர் என்ன முடிவெடுத்தாலும் சரியாக இருக்கும்” என்று சம்பந்தமில்லாமல் சிரித்துக்கொண்டே பதிலளித்துவிட்டுச் சென்றார். இந்த வீடியோ சமூக வலைத்தளங்களில் வைரலானதைத் தொடர்ந்து, தேர்தல் பிரச்சாரத்தின் போது “பெண்களை அடிமைப்படுத்தும் ஆட்சி தேவையா?” என அவர் ஆவேசமாகப் பேசிய பழைய வீடியோவையும் இதனுடன் இணைத்து நெட்டிசன்கள் அவரைச் சரமாரியாக விமர்சித்து ட்ரோல் செய்யத் தொடங்கினர். ஒரு பெண் அமைச்சராக இருந்துகொண்டு இத்தகைய கொடூர சம்பவத்திற்கு உரிய பதில் அளிக்காமல் சிரித்துக்கொண்டே சென்றது ஏன் என்று பலரும் கண்டனம் தெரிவித்தனர்.

இவ்விவகாரம் பெரும் சர்ச்சையானதைத் தொடர்ந்து, அமைச்சர் கீர்த்தனா தனது செயலுக்குப் புதிய விளக்கம் ஒன்றை அளித்துள்ளார். தொழில்துறை கூட்டத்தை முடித்துவிட்டு செய்தியாளர்களைச் சந்தித்துத் திரும்பிய போது, இயல்பாக வெளிப்பட்ட தனது புன்னகை தவறாகப் புரிந்துகொள்ளப்பட்டு, அரசியல் நோக்கில் திரிக்கப்பட்டுள்ளதாக வருத்தம் தெரிவித்துள்ளார். மேலும், கோவையில் சிறுமிக்கு நடந்த கொடுஞ்செயல் மிகுந்த வேதனை அளிப்பதாகவும், முதலமைச்சர் ஜோசப் விஜய் அவர்களின் உத்தரவின் பேரில் 5 தனிப்படைகள் அமைக்கப்பட்டு 24 மணி நேரத்திற்குள் குற்றவாளி கைது செய்யப்பட்டுள்ளார் என்றும் குறிப்பிட்டுள்ளார். உண்மைகளைத் திரித்து, ஒரு பெண்ணின் உடல்மொழியை அரசியல் ஆயுதமாக மாற்றித் தனிப்பட்ட முறையில் தாக்குவது ஆரோக்கியமான அணுகுமுறை அல்ல என்றும் அவர் தனது விளக்கத்தில் சுட்டிக்காட்டியுள்ளார்.