வீட்டு வாசலில் காத்திருந்த மரணம்.. 20 அடி தூரம் தூக்கி வீசப்பட்ட வழக்கறிஞர்.. ஸ்கார்பியோ கார் ஏற்றி படுகொலை.. பின்னணியில் உள்ள ‘அந்த’ விவகாரம்.. பதறவைக்கும் சிசிடிவி காட்சி..!!

தெலங்கானா மாநிலம் ஐதராபாத்தில், வக்பு வாரிய நில ஆக்கிரமிப்பாளர்களுக்கு எதிராக சட்டப் போராட்டம் நடத்தி வந்த 63 வயதான வழக்கறிஞர் காஸா மொய்சுதின், அவரது வீட்டு வாசலிலேயே காரால் இடித்துக் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது. சாந்தி நகர் பகுதியில் அதிகாலை 5.30 மணியளவில் அவர் நீச்சல் பயிற்சிக்குச் செல்வதற்காகத் தனது காரில் ஏற முயன்றபோது, அதிவேகமாக வந்த பச்சை நிற ஸ்கார்பியோ வாகனம் ஒன்று அவர் மீது பயங்கரமாக மோதியுள்ளது. இதில் சுமார் 20 அடி தூரம் தூக்கி வீசப்பட்ட அவர், மருத்துவமனையில் சிகிச்சை பலனின்றி உயிரிழந்தார். இந்த கொடூர விபத்தின் சிசிடிவி (CCTV) காட்சிகள் இணையத்தில் வெளியாகி பொதுமக்களிடையே பெரும் பரபரப்பை ஏற்படுத்தியுள்ளன.

இந்த படுகொலைக்கு ஐதராபாத்தைச் சேர்ந்த இரண்டு கல்வியாளர்களே காரணம் என்று வழக்கறிஞரின் மகன் முகமது ஃபர்ஹான் குற்றம் சாட்டியுள்ளார். நகரத்தில் உள்ள மூன்று முக்கிய வக்ஃபு கல்வி நிறுவனங்களின் பொதுச் சொத்துக்களைத் தனியார் அறக்கட்டளைகள் மூலம் ஆக்கிரமிப்பதை எதிர்த்து மொய்சுதின் தொடர்ந்து வழக்குகளை நடத்தி வந்துள்ளார். இதன் காரணமாக அவருக்குப் பல்வேறு மிரட்டல்கள் வந்ததாகவும், ஏற்கனவே 5 முறை கொலை முயற்சிகள் நடந்துள்ளதாகவும் அவரது மகன் தெரிவித்துள்ளார். மேலும், வழக்குகளைத் திரும்பப் பெறுவதற்காக இடைத்தரகர்கள் மூலம் அவருக்குப் பண ஆசை காட்டப்பட்டும், அவர் அதற்குப் பணியாததால் இந்தத் திட்டமிட்ட கொலை அரங்கேற்றப்பட்டுள்ளதாகக் குடும்பத்தினர் புகார் தெரிவித்துள்ளனர்.

இச்சம்பவம் குறித்து வழக்குப் பதிவு செய்துள்ள காவல்துறையினர், குற்றவாளிகளை விரைந்து கைது செய்வதற்காக ஐந்து தனிப்படைகளை அமைத்து தீவிர விசாரணை மேற்கொண்டு வருகின்றனர். இதற்கிடையில், இந்தத் துணிச்சலான படுகொலைக்கு வழக்கறிஞர்கள் சங்கம் கடும் கண்டனம் தெரிவிப்பதுடன், உயிரிழந்த மொய்சுதீனின் குடும்பத்தினருக்கு உரிய போலீஸ் பாதுகாப்பு வழங்க வேண்டும் எனவும் கோரிக்கை விடுத்துள்ளது. வக்பு நில மீட்புக்காகப் போராடிய வழக்கறிஞர் படுகொலை செய்யப்பட்ட விவகாரம் ஐதராபாத்தில் தற்பொழுது சட்டம்-ஒழுங்கு குறித்த விவாதத்தை எழுப்பியுள்ளது.