கன்னியாகுமரியில் நடந்த பயங்கரம்… போலீசைப் பார்த்ததும் பெண் செய்த ‘அந்த’ காரியம்.. பதறிப்போன ஊர் மக்கள்… நள்ளிரவில் நடந்த பகீர் சம்பவம்…!

கன்னியாகுமரி மாவட்டத்தில் பண மோசடி வழக்கில் தொடர்புடைய குற்றவாளியைக் கைது செய்யச் சென்ற காவல் துறையினர் மீது, அவரது குடும்பத்தினர் வளர்ப்பு நாயை ஏவிக் கடிக்க வைத்த துணிகரச் சம்பவம் தமிழகம் முழுவதும் பெரும் அதிர்ச்சியையும் பரபரப்பையும் ஏற்படுத்தியுள்ளது. குமரி மாவட்டம் மேல நெய்யூர் பகுதியைச் சேர்ந்த ஜவுளி வியாபாரியான கிரேட் பிரின்ஸ் ராஜ் என்பவர், தொழிலில் ஏற்பட்ட நஷ்டத்தால் தவித்து வந்துள்ளார். இதைப் பயன்படுத்திக் கொண்ட அவரது உறவினர்களான தோவாளை தேவர் நகரைச் சேர்ந்த கிருஷ்ணவேணி மற்றும் அவரது கணவர் நாகசுமன் (26) ஆகிய தம்பதியினர், பிரின்ஸ் ராஜின் குடும்பச் சொத்துக்களை வழக்கு தொடர்ந்து மீட்டுத் தருவதாக ஆசைவார்த்தை கூறியுள்ளனர். இதனை நம்பி அவரிடமிருந்து தவணை முறையில் ரூ.5,93,390 பணத்தையும், ஒரு சொகுசு காரையும் அந்தத் தம்பதியினர் வாங்கியுள்ளனர்.

ஆனால், நீண்ட நாட்களாகியும் சொத்தையும் மீட்டுத் தராமல், வாங்கிய பணம் மற்றும் காரையும் திருப்பித் தராமல் ஏமாற்றி வந்ததால், ஏமாற்றமடைந்த பிரின்ஸ் ராஜ் ஆரல்வாய்மொழி காவல் நிலையத்தில் புகார் அளித்தார். இப்புகாரின் பேரில் போலீஸார் வழக்குப் பதிவு செய்து, முதற்கட்டமாக தம்பதியிடமிருந்த காரைப் பறிமுதல் செய்தனர். இதைத் தொடர்ந்து போலீஸாருக்குப் பயந்து தலைமறைவாக இருந்த நாகசுமன் மற்றும் கிருஷ்ணவேணி ஆகிய இருவருமே, தோவாளையில் உள்ள தங்களது வீட்டில் ரகசியமாகத் தங்கியிருப்பதாக போலீஸாருக்குத் தகவல் கிடைத்தது. அதன்பேரில், இன்ஸ்பெக்டர் பச்சைமால் தலைமையில், சப்-இன்ஸ்பெக்டர் அனுஜன் உள்ளிட்ட போலீஸார் அடங்கிய தனிப்படை அதிரடியாக அந்த வீட்டிற்குள் நுழைந்தது.

அப்போது வீட்டிற்குள் இருந்த நாகசுமனை போலீஸார் கைது செய்ய முயன்றபோது, அவரது மனைவி கிருஷ்ணவேணி கடுமையான எதிர்ப்பு தெரிவித்து, போலீஸாரை உள்ளே வரவிடாமல் தடுத்துள்ளார். மேலும், காவல் துறையினரை ஆபாச வார்த்தைகளால் திட்டி வாக்குவாதத்தில் ஈடுபட்டவர், ஒருகட்டத்தில் சட்டத்தின் பிடியிலிருந்து தப்பிக்க நினைத்து, வீட்டில் இருந்த தங்களது வளர்ப்பு நாயை அவிழ்த்து விட்டு “அவர்களைக் கடி” என போலீஸார் மீது ஏவியுள்ளார். கிருஷ்ணவேணி கட்டளையிட்ட உடனே பாய்ந்து வந்த அந்த நாய், சப்-இன்ஸ்பெக்டர் அனுஜனை நோக்கிப் பாய்ந்து அவரது உடலில் பயங்கரமாகக் கடித்தது. இதில் பலத்த ரத்தக் காயமடைந்த சப்-இன்ஸ்பெக்டர் சம்பவ இடத்திலேயே அலறியதால், அப்பகுதியே போர்க்களமாக மாறியதுடன், சுற்றுவட்டார மக்களும் அங்கு திரண்டனர்.

நாய் மூலம் நடத்தப்பட்ட இந்தத் திடீர் தாக்குதலிலும் தங்களது சாமர்த்தியத்தை கைவிடாத போலீஸார், மோசடி தம்பதியான நாகசுமன் மற்றும் கிருஷ்ணவேணி ஆகிய இருவரையும் சம்பவ இடத்திலேயே அதிரடியாகக் கைது செய்தனர். இதன்பின் அவர்களிடம் நடத்திய தீவிர விசாரணையில், கைது செய்யப்பட்ட நாகசுமன் மீது ஏற்கனவே மதுரை தெப்பக்குளம், அண்ணா நகர், நீலகிரி மாவட்டம் ஊட்டி, நெல்லை மாவட்டம் நாங்குநேரி மற்றும் திருப்பூர் மாவட்டம் மடத்துக்குளம் உள்ளிட்ட பல்வேறு காவல் நிலையங்களில் பல மோசடி வழக்குகள் நிலுவையில் இருப்பது தெரியவந்தது. கடமைக்காக வந்த சப்-இன்ஸ்பெக்டரை நாய் ஏவிக் கடிக்க வைத்த இந்த விசித்திரமான மற்றும் ஆபத்தான சம்பவம் தற்பொழுது தமிழக அளவில் பெரும் சலசலப்பை ஏற்படுத்தியுள்ளது.