“36 கோடி வரி பாக்கி”… ஜெயலலிதா வருமான வரி வழக்கு… உயர்நீதிமன்ற தீர்ப்பால் பரபரக்கும் தமிழக அரசியல்….!

முன்னாள் முதலமைச்சர் ஜெயலலிதாவின் வருமான வரி பாக்கி தொடர்பான வழக்கில், அவரிடமிருந்து வரி வசூல் செய்யும் நடவடிக்கைகளுக்கு சென்னை உயர்நீதிமன்றம் இடைக்காலத் தடை விதித்துள்ளது. ஜெயலலிதா செலுத்த வேண்டிய சுமார் 36.56 கோடி ரூபாய் வரி பாக்கியை, அவரது சட்டப்பூர்வ வாரிசுகளாக அறிவிக்கப்பட்ட ஜெ. தீபா மற்றும் ஜெ. தீபக் ஆகியோர் 7 நாட்களுக்குள் செலுத்த வேண்டும் என்று வருமான வரித்துறை நோட்டீஸ் அனுப்பியிருந்தது. இந்த நோட்டீஸை எதிர்த்து ஜெ. தீபா தொடர்ந்த வழக்கை விசாரித்த நீதிமன்றம், இந்த அதிரடி உத்தரவைப் பிறப்பித்துள்ளது.

இந்த வழக்கில் ஜெயலலிதாவின் வாரிசுகள் தரப்பில் முன்வைக்கப்பட்ட வாதத்தில், வருமான வரித்துறை கோரும் வரியானது மிக அதிகமானது என்றும், சொத்துக்களின் மதிப்பைக் கணக்கிடுவதில் குளறுபடிகள் இருப்பதாகவும் தெரிவிக்கப்பட்டது. குறிப்பாக, போயஸ் கார்டன் இல்லம் உள்ளிட்ட பல சொத்துக்கள் தற்போது அரசின் கட்டுப்பாட்டில் இருப்பதையும், வரி கணக்கீட்டில் உள்ள முரண்பாடுகளைக் களைந்து முறையான மறுஆய்வு தேவை என்றும் வாதாடப்பட்டது. இதனை ஏற்றுக்கொண்ட நீதிமன்றம், முதற்கட்டமாக வசூல் நடவடிக்கைகளுக்கு முற்றுப்புள்ளி வைத்துள்ளது.

இந்த உத்தரவு ஜெயலலிதாவின் வாரிசுகளுக்கு ஒரு பெரிய நிம்மதியை அளித்துள்ளது. வருமான வரித்துறை கோரியுள்ள 36 கோடி ரூபாய் பாக்கியில், ஏறத்தாழ 13 கோடி ரூபாய் வரை குறைக்க வாய்ப்புள்ளதாகத் தகவல்கள் வெளியாகியுள்ளன. இந்த வழக்கு மீண்டும் விசாரணைக்கு வரும்போது, வரி பாக்கி குறித்த இறுதித் தொகை மற்றும் அதனைச் செலுத்தும் முறை குறித்து தெளிவான முடிவு எட்டப்படும் என்று எதிர்பார்க்கப்படுகிறது. அதுவரை வருமான வரித்துறை எந்தவித ஜப்தி அல்லது கடுமையான நடவடிக்கைகளையும் மேற்கொள்ள முடியாது என்பது குறிப்பிடத்தக்கது.