பூஜை செய்தால் தங்கம் டபுள் ஆகுமா?…. புதுக்கோட்டை பெண் நம்பி வந்த தேனி.. கடைசியில் நடந்த பயங்கர ட்விஸ்ட்….!

புதுக்கோட்டை மாவட்டம் கீரனூரைச் சேர்ந்த 55 வயதான சித்திபவுசியா என்ற பெண்மணி, தேனியில் உள்ள கும்பலால் நகை மற்றும் பணத்தை இரட்டிப்பாக்கி தருவதாகக் கூறி ஏமாற்றப்பட்டுள்ளார். கடந்த ஓராண்டுக்கு முன்பு தேனி வீரபாண்டியைச் சேர்ந்த நாகராஜ் என்பவருடன் ஏற்பட்ட அறிமுகத்தின் மூலம், சுக்குவாடன்பட்டியைச் சேர்ந்த ஆண்டவர் உள்ளிட்ட சிலருடன் சித்திபவுசியாவுக்கு தொடர்பு ஏற்பட்டுள்ளது. இவர்கள் தங்களிடம் இருக்கும் “மந்திரக் கற்களை” வைத்துப் பூஜை செய்தால் செல்வங்கள் பெருகும் என்று ஆசை வார்த்தை கூறி அந்தப் பெண்ணை நம்ப வைத்துள்ளனர்.

இந்த மோசடித் திட்டத்தை நம்பிய சித்திபவுசியா, தனது நண்பர்களான வெங்கடேசன் மற்றும் பெரியண்ணா ஆகியோருடன் புதுக்கோட்டையிலிருந்து தேனிக்குச் சென்றுள்ளார். அங்கு கிருஷ்ணா நகரில் உள்ள ஒரு வீட்டில் வைத்து ஆண்டவர் ஒரு வண்ணக் கல்லைக் காட்டி பூஜை செய்துள்ளார். அப்போது மந்திரக் கற்களுக்கு முன்னால் நகை மற்றும் பணத்தை வைத்தால் அவை இரட்டிப்பாகும் என்று அவர் கூறவே, சித்திபவுசியா தனது 2 பவுன் நகை, 50 ஆயிரம் ரூபாய் பணம் மற்றும் செல்போனை வைத்துள்ளார். அவருடன் வந்தவர்களும் தங்களிடம் இருந்த பணத்தையும் போன்களையும் அங்கு வைத்துள்ளனர்.

பூஜை முடிந்த பிறகு, மறுநாள் வந்து இரட்டிப்பான நகை மற்றும் பணத்தைப் பெற்றுக்கொள்ளுமாறு கூறி அவர்களை ஆண்டவர் அனுப்பி வைத்துள்ளார். ஆனால், மறுநாள் அவர்கள் வந்து கேட்டபோது, நகை மற்றும் பணத்தைத் தர மறுத்ததோடு மட்டுமல்லாமல், இதுகுறித்து வெளியில் சொன்னால் கொலை செய்துவிடுவோம் என்று அந்தக் கும்பல் மிரட்டியுள்ளது. இதனால் அதிர்ச்சியடைந்த சித்திபவுசியா உடனடியாக தேனி அல்லிநகரம் காவல் நிலையத்தில் புகார் அளித்துள்ளார்.

பாதிக்கப்பட்ட பெண்ணின் புகாரின் பேரில் வழக்குப் பதிவு செய்த போலீசார் தீவிர விசாரணை மேற்கொண்டு, ஆண்டவர், நாகராஜ் மற்றும் விக்னேஸ்வரன் ஆகிய மூன்று பேரைக் கைது செய்தனர். விசாரணையில், ஆண்டவர் என்பவர் ஏற்கனவே தேனி மற்றும் வீரபாண்டி பகுதிகளில் சினிமா பாணியில் இதுபோன்று பல மோசடி வேலைகளில் ஈடுபட்டு ஜாமீனில் வெளியே வந்தவர் என்பது தெரியவந்துள்ளது. இந்த மோசடி கும்பலில் தொடர்புடைய மற்ற நபர்களைப் போலீசார் தற்போது தீவிரமாகத் தேடி வருகின்றனர்.