“திருமணமாகி 2 வருஷம்.. 56 நாள் குழந்தை.. ஒரு ஃபேன் பிளக்”… குழந்தையை தூங்க வைக்க முயன்ற தந்தைக்கு நேர்ந்த விபரீதம்…!

புதுக்கோட்டை மாவட்டம் ஆலங்குடி அருகே உள்ள அரையபட்டி கிராமத்தில், பிறந்து சில நாட்களே ஆன தன் குழந்தையைத் தூங்க வைப்பதற்காக மேசை மின்விசிறியின் (Table Fan) பிளக்கை மாட்டியபோது மின்சாரம் தாக்கி தந்தை லோகநாதன் (35) என்பவர் பரிதாபமாக உயிரிழந்தார். சென்ட்ரிங் தொழிலாளியான இவருக்கும் இவரது மனைவி சத்யாவிற்கும் திருமணமாகி இரண்டு ஆண்டுகள் ஆன நிலையில், கடந்த 56 நாட்களுக்கு முன்புதான் அழகான ஆண் குழந்தை பிறந்துள்ளது. இந்நிலையில், வீட்டில் இருந்த மேசை மின்விசிறியை இயக்க லோகநாதன் பிளக் பாயிண்ட்டில் சொருக முயன்றபோது, எதிர்பாராதவிதமாக அவர் மீது மின்சாரம் பாய்ந்து சம்பவ இடத்திலேயே தூக்கி வீசப்பட்டு பரிதாபமாக உயிரிழந்தார்.

இச்சம்பவம் குறித்து தகவல் அறிந்த ஆலங்குடி காவல்துறையினர் வழக்குப்பதிவு செய்து தீவிர விசாரணை நடத்தி வருகின்றனர். ஆசையாய் வளர்க்க வேண்டிய தன் பச்சிளம் குழந்தையைத் தூங்க வைப்பதற்காக மின்விசிறி போடச் சென்ற தந்தை, மின்சாரம் தாக்கி பலியான இக்கோர விபத்து அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது. மின் சாதனங்களைக் கையாளும்போது பொதுமக்கள் அனைவரும் மிகுந்த எச்சரிக்கையுடனும் கவனத்துடனும் இருக்க வேண்டும் என்பதை இந்த துயர நிகழ்வு மீண்டும் நமக்கு உணர்த்துகிறது.