“மீண்டும் எலிக்கறி சாப்பிடும் நிலை”… ஜெயிலுக்கு போகக்கூட நான் ரெடி.. அன்புமணி ராமதாஸ் அதிரடி எச்சரிக்கை… ஜல்லிக்கட்டு பாணியில் வெடிக்கப் போகும் அடுத்த மாபெரும் புரட்சி..!

காவிரி ஆற்றின் குறுக்கே மேகதாதுவில் புதிய அணை கட்ட முயலும் கர்நாடக அரசின் திட்டத்தை எதிர்த்தும், தமிழகத்தின் வாழ்வாதார உரிமைகளை மீட்டெடுக்க வலியுறுத்தியும் பாட்டாளி மக்கள் கட்சியின் தலைவர் அன்புமணி ராமதாஸ் நான்கு நாட்கள் தொடர் நடைபயணத்தை மேற்கொண்டு வருகிறார். இதன் ஒரு பகுதியாக, திருச்சியில் உள்ள வரலாற்றுச் சிறப்புமிக்க கல்லணையைப் பார்வையிட்ட பின் அவர் செய்தியாளர்களைச் சந்தித்தார். அப்போது, மேகதாது அணை விவகாரத்தில் தமிழக மக்களின் விழிப்புணர்வு இன்னும் போதிய அளவில் இல்லை என்றும், அரசியல் கட்சிகள் வேறு சில தேவையற்ற விவாதங்களிலேயே கவனம் செலுத்தி வருவதாகவும் அவர் தனது வேதனையை வெளிப்படுத்தினார்.

பெங்களூரு நகரத்தின் குடிநீர் தேவையை முன்னிறுத்தி அணை கட்டப்படுவதாகக் கூறும் கர்நாடக அரசின் வாதத்தை அன்புமணி ராமதாஸ் கடுமையாக மறுத்தார். பெங்களூருவின் ஒட்டுமொத்த குடிநீர் தேவைக்கே வெறும் 5 டிஎம்சி தண்ணீரே போதுமானது என்ற நிலையில், எதற்காக 70 டிஎம்சி கொள்ளளவில் பிரம்மாண்ட அணையைக் கட்ட துடிக்கிறார்கள் என்று அவர் கேள்வி எழுப்பினார். மேகதாதுவில் அணை கட்டப்பட்டுவிட்டால், தமிழகத்திற்கு வர வேண்டிய காவிரி நீர் முற்றிலுமாகத் தடுக்கப்பட்டு, டெல்டா மாவட்டங்கள் கடுமையான வறட்சிக்குள்ளாகும் என்றும், இதனால் வாழ்வாதாரத்தை இழக்கும் விவசாயிகள் மீண்டும் எலிக்கறி சாப்பிட வேண்டிய அவல நிலைக்குத் தள்ளப்படுவார்கள் என்றும் அவர் எச்சரித்தார்.

இந்த இக்கட்டான சூழலில் இருந்து தமிழகத்தைக் காக்க, தமிழக முதலமைச்சர் உடனடியாக அனைத்துக் கட்சிக் கூட்டத்தைக் கூட்ட வேண்டும் என்று அன்புமணி வலியுறுத்தினார். அதோடு நின்றுவிடாமல், தமிழகத்தைச் சேர்ந்த அனைத்துக் கட்சி நாடாளுமன்ற மற்றும் சட்டமன்ற உறுப்பினர்களை டெல்லிக்கு அழைத்துச் சென்று, பிரதமர் மற்றும் மத்திய நீர்வளத்துறை அமைச்சரை நேரில் சந்தித்து உரிய அழுத்தம் கொடுக்க வேண்டும் என்றும் கேட்டுக் கொண்டார். மத்திய அரசு இதற்கு உடன்படாத பட்சத்தில், டெல்லியிலேயே ஒன்றிணைந்து தொடர் போராட்டங்களை நடத்த வேண்டும் என்றும், காவிரியைக் காக்கும் இந்த அறப்போராட்டத்திற்காகத் தான் சிறை செல்லவும் தயாராக இருப்பதாக அவர் உறுதியளித்தார்.

தற்போது டெல்டா பகுதியில் குருவைச் சாகுபடி செய்ய வேண்டிய பரப்பளவு பெருமளவு குறைந்து, நிலத்தடி நீரை மட்டுமே நம்பி விவசாயம் நடக்கும் அவலம் நீடிப்பதைச் சுட்டிக்காட்டிய அவர், தமிழகத்தின் நீர் மேலாண்மையை மேம்படுத்தப் பல்வேறு நதிகளின் குறுக்கே தடுப்பணைகளைக் கட்டுவது குறித்து நீர்வளத்துறை அமைச்சரைச் சந்தித்து ஆலோசனைகள் வழங்க உள்ளதாகவும் கூறினார். மேலும், அன்று ஜல்லிக்கட்டு உரிமைக்காகத் தமிழக இளைஞர்களும் பொதுமக்களும் எப்படி சாதி, மத பேதமின்றி திரண்டு போராடினார்களோ, அதேபோன்றதொரு மாபெரும் மக்கள் புரட்சியின் மூலமாக மட்டுமே கர்நாடக அரசின் இந்த சதித் திட்டத்தை முறியடிக்க முடியும் என்று கூறி, ஒட்டுமொத்த தமிழக மக்களும் காவிரி உரிமைக்காக ஒன்றிணைய வேண்டும் என அவர் அழைப்பு விடுத்தார்.