மழைக்கால மின்தடையை சமாளிக்க அதிரடி ஆக்ஷன்..! தமிழக அரசின் மாஸ் பிளான்..!

தமிழகத்தில் தென்மேற்கு பருவமழை காலத்தில் தடையற்ற மின்சாரம் வழங்குவதை உறுதி செய்வதற்காக, தமிழ்நாடு மின் உற்பத்தி மற்றும் பகிர்மான கழகம் (TANGEDCO) தீவிர நடவடிக்கைகளை மேற்கொண்டு வருகிறது. மழைக்காலங்களில் ஏற்படும் மின்தடைகளை உடனுக்குடன் சரிசெய்து மின் விநியோகத்தை சீராக வைத்திருக்க கூடுதல் பணியாளர்களை நியமிக்கும் பணியில் மின்வாரியம் தற்போது ஈடுபட்டுள்ளது.

இந்த கூடுதல் பணியாளர்கள் வரும் ஜூன் 2-ஆம் தேதி முதல் ஜூலை 16-ஆம் தேதி வரை, சுமார் 45 நாட்களுக்கு தற்காலிகமாகப் பணியில் ஈடுபடுத்தப்பட உள்ளனர். பருவமழையினால் மின்கம்பங்கள் சரிவது அல்லது மின்கம்பிகள் அறுந்து விழுவது போன்ற அவசர காலப் பாதிப்புகளை விரைவாகச் சரிசெய்ய இந்த தற்காலிகக் குழுக்கள் பயன்படுத்தப்படவுள்ளன.

இப்பணிகளுக்கான ஆள்சேர்ப்பில் வெளிப்படைத்தன்மையைப் பேணவும், முறைகேடுகளைத் தவிர்க்கவும் மின்வாரியம் ஒரு முக்கியக் கட்டுப்பாட்டை விதித்துள்ளது. அதன்படி, தற்போதைய மின்வாரிய அதிகாரிகள் மற்றும் ஊழியர்களின் உறவினர்களை எக்காரணம் கொண்டும் இந்த ஒப்பந்த அடிப்படையில் பணியமர்த்தக் கூடாது என்று மின்சார வாரியம் கடுமையான அறிவுறுத்தலை வழங்கியுள்ளது.