“நடிகர் ரஜினி கூப்பிட்டும் நான் ஏன் போகல தெரியுமா?”…. அண்ணாமலை வெளியிட்ட பரபரப்பு உண்மை… களமிறங்கும் புதிய படை…!

தமிழக பாஜகவின் முக்கிய முகமாக விளங்கிய அண்ணாமலை, அக்கட்சியின் அடிப்படை உறுப்பினர் பொறுப்பு உட்பட அனைத்து பதவிகளிலிருந்தும் விலகுவதாக அதிரடியாக அறிவித்துள்ளார். கடந்த சில காலமாகவே கட்சியின் தலைமை மீது அதிருப்தியில் இருந்த அவர், சமீபத்தில் டெல்லிக்குச் சென்று பாஜக மேலிடப் பொறுப்பாளர் நிதின் நபின் மற்றும் மத்திய உள்துறை அமைச்சர் அமித் ஷா ஆகியோரை நேரில் சந்தித்து தனது ராஜினாமா கடிதத்தை வழங்கியுள்ளார். இதனைத் தொடர்ந்து, சற்று முன்னர் சமூக வலைதள நேரலையில் தோன்றிய அண்ணாமலை, தனது இந்த அரசியல் முடிவிற்கான காரணங்களையும், தமிழக அரசியலில் தனது அடுத்தகட்ட அதிரடி நகர்வுகளையும் விரிவாகப் பகிர்ந்து கொண்டார்.

அவர் தனது நேரலை உரையில், “ஒரு புதிய அரசியலை, அடிப்படை கட்டமைப்பை மாற்றக் கூடிய அரசியலை உருவாக்க வேண்டும் என்ற எண்ணத்தோடுதான் நான் பாஜகவில் இருந்து ராஜினாமா செய்தேன்” என்று குறிப்பிட்டார். மேலும், கடந்த 18 மாதங்களாகவே பாஜக தலைமைக்கும் அவருக்கும் இடையே பல்வேறு கருத்து வேறுபாடுகள் நீடித்து வந்ததாகவும், கடந்த டிசம்பர் 4ஆம் தேதியே தனது விலகல் முடிவை தலைமைக்குத் தெரிவித்துவிட்டதாகவும் கூறினார். கட்சி மேலிடம் தன்னை 2026 சட்டமன்றத் தேர்தல் வரை பொறுத்திருக்குமாறு அறிவுறுத்தியதால், அதற்கேற்ப தேர்தல் வேலைகளைச் செவ்வனே முடித்துக் கொடுத்துவிட்டு, தற்போது சரியான தருணத்தில் வெளியேறியிருப்பதாக அவர் விளக்கமளித்தார்.

தனது பழைய நினைவலைகளைப் பகிர்ந்த அண்ணாமலை, ஐஐஎம்மில் படித்துக் கொண்டிருந்தபோது கேப்டன் விஜயகாந்தின் தேமுதிகவில் மூன்று மாதங்கள் இன்டர்ன்ஷிப் (Internship) செய்ததே அரசியலைத் தான் முதன்முதலில் அருகில் இருந்து பார்க்கக் கிடைத்த வாய்ப்பு என்றார். தொடர்ந்து பேசியவர், 2020ஆம் ஆண்டு நடிகர் ரஜினிகாந்த் தனது கட்சியில் இணையுமாறு தமக்கு அழைப்பு விடுத்ததாகவும், ஆனால் அதற்கு முன்பே பாஜக மூத்த தலைவர் பி.எல். சந்தோஷிற்கு வாக்குறுதி அளித்திருந்ததால் அந்த அழைப்பை ஏற்க முடியாமல் போனது என்றும், பின்னர் சென்னை திரும்பியதும் ரஜினியை நேரில் சந்தித்து மன்னிப்பு கோரியதாகவும் உருக்கமாகத் தெரிவித்தார். மேலும், பாஜகவில் இருந்த 6 ஆண்டுகளில் மும்மொழிக் கொள்கைக்கு எதிராக குரல் கொடுத்தது உட்பட, தமிழ்நாட்டின் உரிமைகளையும், தமிழ் உணர்வுகளையும் தான் ஒருபோதும் விட்டுக் கொடுத்ததே இல்லை என்றும் அவர் பெருமிதத்துடன் குறிப்பிட்டார்.

இறுதியாக, “நான் பெருமை மிகுந்த இந்தியன், பாரம்பரியத் தமிழன் என்ற அடையாளத்தோடு ஒரு புதிய அரசியல் இயக்கத்தைத் தொடங்குகிறேன்” என்று அண்ணாமலை பிரகடனம் செய்தார். தனிநபர் துதிபாடும் அரசியலுக்கு முற்றுப்புள்ளி வைக்க வேண்டும் என்றும், தன் புதிய இயக்கத்தில் நிரந்தர எம்.எல்.ஏ, நிரந்தர அமைச்சர் என யாரும் கிடையாது, சாமானியர்களுக்கும் சம வாய்ப்பு வழங்கப்படும் என்றும் உறுதியளித்தார். இதற்காக கோவையில் முன்னாள் குடியரசுத் தலைவர் அப்துல் கலாம் பெயரில் அரசியல் பயிற்சி மையம் தொடங்கப்படும் என்றும், அரசியலில் ஆர்வமுள்ளவர்கள் www.wetheleader.org என்ற இணையதளத்தில் இணைந்து பயிற்சி பெறலாம் என்றும் அழைப்பு விடுத்தார். தமிழகத்தின் வளர்ச்சியை முதன்மைப்படுத்தி, தூய்மையான மற்றும் நாகரிகமான அரசியலை முன்னெடுத்து, வரும் உள்ளாட்சித் தேர்தல் மற்றும் அடுத்தடுத்த தேர்தல்களில் தங்களது புதிய இயக்கம் தடம் பதிக்கும் என்றும் அண்ணாமலை உறுதியாகத் தெரிவித்தார்.