சூப்பர் நியூஸ்..! “மருத்துவமனைகளில் இனி ஆன்லைனில் OP சீட்டு பதியலாம்” அமைச்சர் அருண்ராஜ் அறிவிப்பு..!!

அரசு மருத்துவமனைகளில் புறநோயாளிகள் (OP) பிரிவில் சிகிச்சைக்கு வரும் பொதுமக்களின் எண்ணிக்கை நாளுக்கு நாள் அதிகரித்து வருவதால், நீண்ட வரிசையில் காத்திருந்து மக்கள் அவதிப்படும் சூழல் நிலவுகிறது. இந்த சிரமத்திற்கு நிரந்தர தீர்வு காணும் வகையில், நவீன தொழில்நுட்ப வசதியுடன் கூடிய ஆன்லைன் OP சீட்டு முறை விரைவில் அறிமுகப்படுத்தப்பட உள்ளது. இதன் மூலம் நோயாளிகள் மற்றும் அவர்களுடன் வருபவர்கள் மருத்துவமனை வளாகங்களில் பல மணி நேரம் தவிப்பது முற்றிலும் தவிர்க்கப்படும் என்று மக்கள் நல்வாழ்வுத்துறை அமைச்சர் அருண் ராஜ் அதிகாரப்பூர்வமாக தெரிவித்துள்ளார்.

இந்த புதிய திட்டத்திற்காகப் பொதுமக்கள் எளிதாகப் பயன்படுத்தும் வகையில் ஒரு பிரத்யேக மொபைல் செயலி (Mobile App) உருவாக்கப்பட உள்ளது. இச்செயலியின் மூலம் நோயாளிகள் தங்களின் விவரங்களைப் பதிவிட்டு, மருத்துவமனைக்கு வருவதற்கு முன்பாகவே முன்பதிவு செய்து தங்களுக்கான OP சீட்டை ஆன்லைனிலேயே பெற்றுக் கொள்ளலாம். இந்த அதிநவீன டிஜிட்டல் வசதியானது மருத்துவமனைகளில் கூட்ட நெரிசலைக் குறைப்பதுடன், பொதுமக்கள் தங்களுக்குக் குறிப்பிட்ட நேரத்தில் நேரடியாகச் சென்று உரிய மருத்துவச் சிகிச்சையை விரைவாகப் பெற பெரிதும் வழிவகுக்கும்.