அதிமுக கோட்டையில் தாமரை கொடி?…. முக்கிய தொகுதியில் களமிறங்கும் வானதி சீனிவாசன்… செம ஷாக்கில் இபிஎஸ்….!

தமிழக சட்டமன்றத் தேர்தல் நெருங்கி வரும் வேளையில், அரசியல் கட்சிகள் தங்களின் தேர்தல் வியூகங்களை வகுப்பதில் மும்முரம் காட்டி வருகின்றன. இந்தச் சூழலில், கோவை தெற்கு தொகுதியின் தற்போதைய சட்டமன்ற உறுப்பினரும், பாஜக தேசிய மகளிர் அணி தலைவருமான வானதி சீனிவாசன், வரும் தேர்தலில் கோவை வடக்கு தொகுதிக்கு மாறக்கூடும் என்ற தகவல் அரசியல் வட்டாரத்தில் பலத்த விவாதத்தை ஏற்படுத்தியுள்ளது. சமீபகாலமாக கோவை வடக்கு தொகுதிக்கு உட்பட்ட பகுதிகளில் அவர் அதிக அளவிலான கட்சி நிகழ்ச்சிகளை ஒருங்கிணைப்பதும், அங்குள்ள பொதுமக்களுடன் நெருக்கமான தொடர்பைப் பேணுவதும் இந்த யூகங்களுக்கு வலுசேர்க்கும் விதமாக அமைந்துள்ளது.

கோவை வடக்கு தொகுதிக்கு உட்பட்ட வேலாண்டிபாளையத்தில் பாஜக சார்பில் நடத்தப்பட்ட ‘தாமரை கோலத் திருவிழா’ நிகழ்ச்சியில் கலந்துகொண்ட வானதி சீனிவாசனிடம், தொகுதி மாற்றம் குறித்து செய்தியாளர்கள் கேள்வி எழுப்பினர். அதற்கு நேரடியாகப் பதிலளிக்காத அவர், “கட்சியின் மகளிர் அணி அனைத்து இடங்களிலும் இயங்கி வருகிறது, உங்கள் யூகங்களுக்கெல்லாம் பதில் சொல்ல முடியாது” என்று சூசகமாகத் தெரிவித்தார். மேலும், பொங்கல் பண்டிகையை முன்னிட்டு தமிழகம் முழுவதும் தாமரை கோலத் திருவிழா மூலம் மத்திய அரசின் திட்டங்களை மக்களிடம் கொண்டு சேர்க்கும் பணியில் பாஜக ஈடுபட்டுள்ளதாகவும் அவர் விளக்கம் அளித்தார்.

இருப்பினும், கோவை வடக்கு தொகுதியின் அதிமுக எம்.எல்.ஏ வராத நிலையில், அவரது ஆதரவாளர்கள் வானதி சீனிவாசன் கலந்துகொண்ட நிகழ்ச்சியில் பங்கேற்றது கூட்டணி ரீதியிலான முக்கியத்துவத்தைப் பெற்றுள்ளது. தேசிய ஜனநாயகக் கூட்டணியின் முதல் கூட்டம் வரும் 23-ஆம் தேதி பிரதமர் தலைமையில் நடைபெற உள்ள நிலையில், தொகுதிப் பங்கீடு மற்றும் வேட்பாளர் தேர்வு குறித்த அதிகாரப்பூர்வ அறிவிப்புகள் வெளியான பிறகே, வானதி சீனிவாசன் தொகுதி மாறுவது குறித்த இறுதிச் சித்திரம் வெளிப்படும். தற்போது வரை இது ஒரு யூகமாகவே இருந்தாலும், கோவை வடக்கு தொகுதியில் அவர் காட்டும் அதீத ஆர்வம் பாஜக தொண்டர்களிடையே மிகுந்த எதிர்பார்ப்பை உருவாக்கியுள்ளது.