“பாஜக போல் வேண்டாம்”.. கிறிஸ்தவர் + இஸ்லாமியர்களை கவர போட்ட மெகா ஸ்கெட்ச்.. அண்ணாமலை தொடங்கும் புதுக்கட்சியின் கொள்கை இதுதான்.. ஆடிப்போன பாஜக மேலிடம்..!!

கடந்த 2020ஆம் ஆண்டு பாஜகவில் இணைந்து, மிகக் குறுகிய காலத்திலேயே தமிழ்நாடு மாநிலத் தலைவராக உயர்ந்தவர் அண்ணாமலை. கடந்த ஆண்டு அதிமுகவுடன் கூட்டணி வைப்பதற்காக அவரது தலைவர் பதவி பறிக்கப்பட்டு நயினார் நாகேந்திரனிடம் ஒப்படைக்கப்பட்டதால், அவர் கடும் அதிருப்தியில் இருந்து வந்தார். இந்நிலையில், பாஜகவில் இருந்து முற்றிலும் விலக முடிவெடுத்த அண்ணாமலை, டெல்லியில் மத்திய உள்துறை அமைச்சர் அமித் ஷா, பாஜக தேசியத் தலைவர் நிதின் நபின், மற்றும் அமைப்புச் செயலாளர் பி.எல். சந்தோஷ் ஆகியோரை நேரில் சந்தித்துப் பேசினார். தற்காலிகமாகப் பொறுத்திருக்குமாறு மேலிடத் தலைவர்கள் சமாதானம் செய்த போதிலும், அண்ணாமலை பாஜகவிற்கு ‘குட்பை’ சொல்வதிலும், தனது விலகல் கடிதத்தை அளிப்பதிலும் உறுதியாக உள்ளதாகக் கூறப்படுகிறது.

பாஜகவில் இருந்து விலகும் அண்ணாமலை, தமிழ்நாட்டில் தனது அடுத்தகட்ட அரசியல் நகர்வாகப் புதிய கட்சி ஒன்றைத் தொடங்கத் தீவிரமாகத் திட்டமிட்டு வருகிறார். பொதுவாக, பாஜக என்பது இந்து மதத்தினருக்கும், அது சார்ந்த நடைமுறைகளுக்கும் மட்டுமே முன்னுரிமை அளிக்கும் கட்சி என்ற பரவலான பிம்பம் உள்ளது. ஆனால், அண்ணாமலை தொடங்கவுள்ள புதிய கட்சி அந்தப் பாதையிலிருந்து முற்றிலும் விலகி, அனைத்துச் சாதி மற்றும் மதத்தினரையும் சமமாக ஒருங்கிணைக்கும் ஒரு புதிய தளமாக இருக்கும் எனத் தெரிகிறது. அதாவது, தீவிர இந்துத்துவா அரசியலைத் தவிர்த்து, மதச்சார்பற்ற கொள்கையுடனும், அதே நேரத்தில் ஒரு தேசியப் பார்வையுடனும் தனது புதிய கட்சியை அவர் முன்னிறுத்தவுள்ளார்.

அண்ணாமலையின் புதிய கட்சி வெறும் தேசியப் பார்வையோடு மட்டும் நின்றுவிடாமல், தமிழ்நாட்டின் ஆளும் மற்றும் எதிர்க்கட்சிகளான திமுக, அதிமுக போன்ற திராவிடக் கட்சிகளின் சாயலையும் உள்ளடக்கியதாக இருக்கும் என அவரது ஆதரவாளர் வட்டாரங்கள் தெரிவிக்கின்றன. மத்தியில் அதிகாரத்தில் இருக்கும் கட்சிக்குக் கட்டுப்படாமல், திராவிடக் கட்சிகளைப் போலவே ‘தமிழகத்தின் உரிமைகள் மற்றும் மாநில நலன்’ ஆகியவற்றுக்கு முதலிடம் கொடுத்துச் செயல்பட அவர் திட்டமிட்டுள்ளார். இதன் மூலம், தமிழ்நாட்டில் நீண்டகாலமாக இருக்கும் பிராந்திய அரசியல் உணர்வுகளையும், தனது தேசியப் பின்னணியையும் இணைத்து ஒரு புதிய அரசியல் மாற்றத்தை உருவாக்க அவர் காய்நகர்த்தி வருகிறார்.

தமிழகத் தேர்தல் அரசியலில் சுமார் 13 முதல் 16 சதவீதம் வரை உள்ள இஸ்லாமிய மற்றும் கிறிஸ்தவச் சிறுபான்மையினரின் வாக்குகள், வெற்றியைத் தீர்மானிப்பதில் மிக முக்கியப் பங்கு வகிக்கின்றன. பொதுவாக பாஜகவின் கொள்கைகளால் சிறுபான்மையினர் வாக்குகள் அக்கட்சிக்குக் கிடைப்பதில்லை என்பதால், தன் மீதும் ‘சிறுபான்மையினருக்கு எதிரானவர்’ என்ற முத்திரை விழுந்துவிடக் கூடாது என்பதில் அண்ணாமலை ஆரம்பத்திலிருந்தே தெளிவாக இருக்கிறார். எனவே, இந்தத் தடையை உடைக்கும் விதமாக, இஸ்லாமியர்களையும் கிறிஸ்தவர்களையும் அரவணைத்து, “சிறுபான்மையினர் – பெரும்பான்மையினர்” என்ற பாகுபாடின்றி அனைவரையும் ‘தமிழர்’ என்ற ஒற்றைக் குடையின் கீழ் ஒருங்கிணைத்துத் தேர்தல் களத்தைக் காண அவர் வியூகம் அமைத்துள்ளார்.