“அதே தவறை செய்யாதீர்கள்”… திமுக வீழ்ந்ததற்கு இதுதான் காரணம்… தமிழகத்தில் ரெஸ்டோ பார்கள்?…. ? தவெக அரசுக்கு அன்புமணி விடுத்த ‘ஸ்ட்ரிக்ட்’ வார்னிங்…!

தமிழகத்தில் டாஸ்மாக் கடைகளுடன் இயங்கி வரும் பார்களின் எண்ணிக்கையை குறைத்து, அண்டை மாநிலங்களைப் போல உணவகங்களுடன் கூடிய ‘ரெஸ்டோ பார்களை’ அமைப்பதற்கான உரிமங்களை வழங்க அரசு பரிசீலித்து வருவதாக ஊடகங்களில் செய்திகள் வெளியாகி வருகின்றன. இந்தத் திட்டம் தமிழகத்தில் மதுப்புழக்கத்தை மேலும் அதிகரிக்கவே செய்யும் என்று பாட்டாளி மக்கள் கட்சியின் (பாமக) தலைவர் மருத்துவர் அன்புமணி ராமதாஸ் தனது காரசாரமான அறிக்கையில் சுட்டிக்காட்டியுள்ளார். நிதிநிலை அறிக்கையில் இதுகுறித்த அறிவிப்பு வெளியாகலாம் என்ற செய்தி அதிர்ச்சியளிப்பதாகக் குறிப்பிட்டுள்ள அவர், இந்த ஆபத்தான திட்டம் குறித்து அரசு உடனடியாக விளக்கமளிக்க வேண்டும் என்றும் வலியுறுத்தியுள்ளார்.

சட்டவிரோத மது விற்பனையைத் தடுக்கவும், வருவாய் இழப்பைச் சரிசெய்யவும் தான் ரெஸ்டோ பார்கள் கொண்டுவரப்பட உள்ளதாக அரசுத் தரப்பில் கூறப்படும் வாதங்கள் முற்றிலும் அபத்தமானவை என்று அன்புமணி ராமதாஸ் சாடியுள்ளார். அரசு மதுக்கடைகளுடான பார்கள் மற்றும் மனமகிழ் மன்றங்களுக்குச் செல்ல பொதுமக்கள் தயங்கும் ஒரு சமூக அச்சம் நிலவி வரும் சூழலில், உணவக வடிவிலான ரெஸ்டோ பார்கள் தொடங்கப்பட்டால் மாணவர்கள் மற்றும் இளம்பெண்கள் எவ்வித தயக்கமுமின்றி மதுப்பழக்கத்திற்கு அடிமையாகும் ஆபத்து ஏற்படும் என்று அவர் எச்சரித்துள்ளார். வருவாயைப் பெருக்குவதற்காக மக்கள் நல அரசு மதுவணிகத்தை ஊக்குவிப்பது முறையல்ல என்றும், மதுவை ஒழுங்குபடுத்துவதை விடுத்து படிப்படியாக முழு மதுவிலக்கை அமல்படுத்துவதே சரியான தீர்வாக இருக்கும் என்றும் அவர் குறிப்பிட்டுள்ளார்.

மேலும், தற்போதைய த.வெ.க. அரசின் கொள்கைத் தலைவர்களான தந்தை பெரியார், பெருந்தலைவர் காமராசர் ஆகியோர் மதுவை கடுமையாக எதிர்த்தவர்கள் என்பதை நினைவூட்டிய அவர், அவர்களின் வழியில் நடப்பதாகக் கூறும் இந்த அரசு புதிய வகை குடிப்பகங்களைத் திறந்தால் அது தீராத அவப்பெயரையே ஏற்படுத்தும் என்றார். முந்தைய திமுக அரசு மக்களால் நிராகரிக்கப்பட்டதற்கு போதைப்பொருள் நடமாட்டமும், அதனால் அதிகரித்த பெண்கள் மற்றும் குழந்தைகளுக்கு எதிரான குற்றங்களுமே முக்கியக் காரணம் என்று குறிப்பிட்ட அவர், தற்போதைய அரசும் அதே தவறைச் செய்யக் கூடாது என்றும், ரெஸ்டோ பார் திட்டத்தைக் கைவிடாவிட்டால் பாமக சார்பில் கடுமையான சட்ட மற்றும் அரசியல் போராட்டங்கள் முன்னெடுக்கப்படும் என்றும் எச்சரித்துள்ளார்.