அடக்கடவுளே..! வகுப்பறையில் இன்ஜெக்ஷன் சோதனை செய்த ஆசிரியர்.. சமூக வலைத்தளங்களில் வைரலாகும் பகீர் வீடியோ

பீகார் மாநிலம் ஃபோர்பிஸ்கஞ்ச் பகுதியைச் சேர்ந்த சி.கே. ராஜ் என்ற பயாலஜி (உயிரியல்) ஆசிரியர், வகுப்பறையில் மாணவர்களுக்கு ஊசி போடும் முறையைக் கற்றுக்கொடுக்கத் தனது சொந்த உடலையே பயன்படுத்தியுள்ளார். வழக்கமாக ஏதேனும் மாதிரிகள் அல்லது கரும்பலகை மூலம் விளக்க வேண்டிய செய்முறைப் பயிற்சியை, அவர் தனது கையில் மாணவர்களைக் கொண்டு நேரடியாக ஊசி போட வைத்துப் பாடம் நடத்தியுள்ளார். இந்த விசித்திரமான மற்றும் அதிர்ச்சியூட்டும் வீடியோ தற்போது சமூக வலைத்தளங்களில் வைரலாகி வருகிறது.

வைரலாகும் அந்த வீடியோவில், ஒரு மாணவி கையில் ஊசியுடன் பயந்து நடுங்கியபடி நிற்பதும், அந்த ஆசிரியர் அவரை தைரியப்படுத்தி “ஊசியைக் குத்து, குத்து…” என்று பீகாரி மொழியில் கூறுவதும் பதிவாகியுள்ளது. அந்த மாணவி ஊசி போட்டவுடன், மற்றொரு மாணவியை அழைத்து அதை எடுக்கச் சொல்கிறார். மேலும், வகுப்பில் உள்ள மற்ற மாணவர்கள் ஊசி சரியாகப் போடப்படவில்லை என்று கூறியதால், பயந்து நடுங்கிய மற்றொரு மாணவனையும் அழைத்து ஆசிரியர் வலுக்கட்டாயமாகத் தன் கையில் மீண்டும் ஊசி போட வைத்துள்ளார்.

https://www.instagram.com/reel/DYdkpsEhr3U/?utm_source=ig_web_copy_link

இந்த வீடியோவை அந்த ஆசிரியரே தனது இன்ஸ்டாகிராம் பக்கத்தில் பகிர்ந்துள்ளார். இதைப் பார்த்த நெட்டிசன்கள் (இணையவாசிகள்) பல்வேறு கருத்துகளைத் தெரிவித்து வருகின்றனர். சிலர் ஆசிரியரின் இந்தச் செயலை மிகவும் ஆபத்தானது மற்றும் பொறுப்பற்றது என்று விமர்சித்தாலும், பலர் “அடுத்ததாக மாணவர்களுக்கு ஆபரேஷன் செய்யும் பயிற்சியையும் இப்படியே கற்றுக்கொடுத்து விடுங்கள்” என்றும், “மாணவர்களைப் பாஸ் செய்ய வைப்பதற்குள் ஆசிரியர் உயிருக்கே ஆபத்து வந்துவிடும் போல” என்றும் நகைச்சுவையாகவும் கிண்டலாகவும் கமெண்ட் செய்து வருகின்றனர்.