“நான் பயந்தபடியே நடந்துடுச்சு”… மெட்டாவில் நடந்த நள்ளிரவு கொடூரம்…. அதிகாலை 4 மணிக்கு வந்த ஒரு மெயில்… உறைந்துபோன கார்ப்பரேட் உலகம்….!

உலகமே செயற்கை நுண்ணறிவு (AI) தொழில்நுட்பத்தை நோக்கி வேகமாக நகர்ந்து கொண்டிருக்கும் வேளையில், சமூக ஊடக ஜாம்பவானான ‘மெட்டா’ (Meta) நிறுவனத்தில் அரங்கேறியுள்ள சமீபத்திய பணிநீக்க நடவடிக்கை ஒட்டுமொத்த கார்ப்பரேட் உலகையும் உலுக்கியுள்ளது. கடந்த மே 20 அன்று சிங்கப்பூர், ஐரோப்பா மற்றும் அமெரிக்கா ஆகிய பிராந்தியங்களைச் சேர்ந்த ஆயிரக்கணக்கான ஊழியர்களுக்கு அதிகாலை 4 மணிக்கே பணிநீக்க மின்னஞ்சல் அனுப்பப்பட்டுள்ளது. மெட்டா நிறுவனம் தனது செயல்பாடுகளை ‘ஏஐ ஃபர்ஸ்ட்’ (AI-First) என்ற கொள்கைக்கு மாற்றுவதாகவும், பெரிய குழுக்களைக் கலைத்துவிட்டு வேகமாகச் செயல்படும் சிறிய ஏஐ குழுக்களை உருவாக்கப் போவதாகவும் அதன் மனிதவள அதிகாரி ஜானெல்லே கேல் தெரிவித்துள்ளார்.

இந்த விவகாரத்தில், ஜூலியன் என்ற நபர் சமூக ஊடகத்தில் பகிர்ந்த ஒரு பதிவுதான் இப்போது கார்ப்பரேட் உலகின் விவாதப் பொருளாக மாறியுள்ளது. சில மாதங்களுக்கு முன்பு மெட்டா நிறுவனம் நடத்திய ‘ஏஐ வாரம்’ (AI Week) என்ற சிறப்புப் பயிற்சியின்போது, ஊழியர்கள் தங்களின் வழக்கமான பணிகளை நிறுத்திவிட்டு புதிய ஏஐ கருவிகளை உருவாக்க அறிவுறுத்தப்பட்டனர். அப்போது ஜூலியனின் மனைவி, நிறுவனத்தின் உயர்மட்ட பொறியாளர்களுடன் இணைந்து பல மாதங்கள் கடினமாக உழைத்து ஒரு ஏஐ டூலை (AI Tool) உருவாக்கியுள்ளார். “நாம் உருவாக்கும் இந்தத் தொழில்நுட்பம் ஒருநாள் நம் வேலையையே பறித்துவிடுமோ” என்று அவர் பயந்தபடியே, அந்த ஏஐ டூல் முழுமையடைந்த சில நாட்களிலேயே அவர் மெட்டாவிலிருந்து அதிரடியாக நீக்கப்பட்டுள்ளார். தான் வளர்த்த கடாவே தன் மார்பில் பாய்ந்தது போல, ஊழியர்கள் உருவாக்கிய ஏஐ தொழில்நுட்பமே அவர்களின் வேலைக்கு உலை வைத்துள்ளது.

இந்த வேலைவாய்ப்பு இழப்புகளுக்குப் பின்னால் மிகப்பெரிய நிதி சார்ந்த உத்திகளும், முதலீட்டு மாற்றங்களும் ஒளிந்துள்ளன. மெட்டா நிறுவனம் இந்த ஆண்டு மட்டும் ஏஐ உட்கட்டமைப்பை (AI Infrastructure) மேம்படுத்துவதற்காகச் சுமார் $100 பில்லியன் வரை முதலீடு செய்யத் திட்டமிட்டுள்ளது. இந்த பிரம்மாண்ட ஏஐ முதலீடுகளுக்கான நிதியைத் திரட்டவும், நிறுவனத்தின் செலவினங்களைக் குறைக்கவும் தான் இந்த ஆட்குறைப்பு நடவடிக்கை எடுக்கப்பட்டுள்ளது. இந்த தற்போதைய பணிநீக்கம் மூலமாக மட்டுமே மெட்டா நிறுவனம் சுமார் $3 பில்லியன் வரை சேமிக்கவுள்ளதாகக் கூறப்படுகிறது. மேலும், ஏற்கனவே பணியாற்றி வந்த சுமார் 7,000 ஊழியர்களை ஏஐ சார்ந்த குழுக்களுக்கு அந்நிறுவனம் அதிரடியாக மாற்றியுள்ளது.

மெட்டாவின் இந்த நடவடிக்கை ஒரு குறிப்பிட்ட நிறுவனத்தோடு நின்றுவிடாமல், உலகளாவிய கார்ப்பரேட் கலாச்சாரத்தின் அபாயகரமான மாற்றத்தை உணர்த்துகிறது. மனித உழைப்பைக் கொண்டு ஆரம்பக்கட்ட ஏஐ கருவிகளை உருவாக்கிவிட்டு, அவை பயன்பாட்டிற்கு வந்ததும் அதே மனிதர்களைத் தூக்கியெறியும் கார்ப்பரேட் போக்கு ஊழியர்களிடையே பெரும் அதிர்ச்சியையும், அச்சத்தையும் ஏற்படுத்தியுள்ளது. தொழில்நுட்பப் புரட்சி என்ற பெயரில் அரங்கேறும் இத்தகைய தொடர் வேலைவாய்ப்பு இழப்புகள், எதிர்காலத்தில் மனித உழைப்புக்கான தேவையை எந்தளவுக்குக் கேள்விக்குறியாக்கும் என்ற விவாதத்தை உலக அரங்கில் தீவிரப்படுத்தியுள்ளது.