‘காந்தாரா’ சர்ச்சை.. கோர்ட் போட்ட உத்தரவு..! மைசூரு சாமுண்டீஸ்வரி கோயிலில் மன்னிப்பு கேட்ட ரன்வீர் சிங்..! நடந்தது என்ன..?

பிரபல பாலிவுட் நடிகர் ரன்வீர் சிங், ‘காந்தாரா சாப்டர்-1’ திரைப்பட விவகாரத்தில் ஏற்பட்ட சர்ச்சையைத் தொடர்ந்து கர்நாடக மாநிலம் மைசூரில் உள்ள புகழ்பெற்ற சாமுண்டீஸ்வரி அம்மன் கோயிலில் நேரில் சுவாமி தரிசனம் செய்தார். கோவாவில் நடைபெற்ற ஃபிலிம்பேர் விருது வழங்கும் விழாவில், ‘காந்தாரா’ படத்தில் வரும் ‘தெய்வ’ வழிபாட்டு முறையின் புனித சைகைகளையும் சத்தத்தையும் ரன்வீர் சிங் கிண்டல் செய்யும் விதமாக இமிடேட் செய்து காட்டியதாகக் கூறப்படுகிறது. இந்த வீடியோ வைரலானதை அடுத்து, இந்து மத நம்பிக்கைகளையும் பழங்குடியின மக்களின் வழிபாட்டையும் அவர் புண்படுத்திவிட்டதாக வலதுசாரி அமைப்புகள் கர்நாடக உயர் நீதிமன்றத்தில் பொதுநல மனு தாக்கல் செய்தன.

இந்த மனுவை விசாரித்த கர்நாடக உயர் நீதிமன்றம், நடிகர் ரன்வீர் சிங் தனது செயலுக்கு எழுத்துப்பூர்வமாக மன்னிப்பு கோர வேண்டும் என்று உத்தரவிட்டது. அதன்படி ரன்வீர் சிங் தரப்பில் முறையான மன்னிப்புக் கடிதம் சமர்ப்பிக்கப்பட்டதைத் தொடர்ந்து, அவர் மீதான சட்டப்பூர்வ நடவடிக்கைகள் அனைத்தையும் நீதிமன்றம் ரத்து செய்தது. அதே வேளையில், தனது செயலுக்குப் பரிகாரமாக அடுத்த நான்கு வாரங்களுக்குள் கர்நாடகாவில் உள்ள சாமுண்டீஸ்வரி அம்மன் கோயிலுக்குச் சென்று நேரில் வழிபட வேண்டும் என்றும் நீதிமன்றம் நிபந்தனை விதித்திருந்தது.

நீதிமன்றக் கெடு முடிவடைய இருந்த நிலையில், நடிகர் ரன்வீர் சிங் எவ்வித முன்னறிவிப்பும் இன்றி முகக்கவசம் அணிந்து சாதாரண பக்தரைப் போல ரகசியமாக மைசூரு சாமுண்டீஸ்வரி கோயிலுக்கு வந்தார். அங்கிருந்த அர்ச்சகரிடம் தான் செய்த தவறுக்காக அம்மனிடம் மன்னிப்புக் கேட்க வந்திருப்பதாகக் கூறி, கர்ப்பக்கிருகத்தில் நடைபெற்ற சிறப்புப் பிரார்த்தனையில் கலந்து கொண்டார். பொதுமக்கள் மற்றும் பக்தர்கள் அதிகளவில் கூடுவதற்கு முன்பாகவே அவர் தனது பரிகார வழிபாட்டை நிறைவு செய்துவிட்டு அங்கிருந்து புறப்பட்டுச் சென்றார்.