திமுகவில் அதிரடி திருப்பம்… திருவாரூரில் களமிறங்க திடீர் திட்டம்… மீண்டும் சட்டமன்றத்திற்குள் நுழைய மு.க.ஸ்டாலின் போடும் மாஸ்டர் பிளான்…!

தமிழக சட்டசபை தேர்தலில் சென்னை கொளத்தூர் தொகுதியில் போட்டியிட்ட திமுக தலைவர் மு.க.ஸ்டாலின், தவெக வேட்பாளர் வி.எஸ்.பாபுவிடம் எதிர்பாராத விதமாக தோல்வியைத் தழுவினார். இதனால் அவர் சட்டசபைக்குச் செல்ல முடியாத நிலை ஏற்பட்டுள்ள சூழலில், தற்போது அவரது மகன் உதயநிதி ஸ்டாலின் எதிர்க்கட்சித் தலைவராகச் செயல்பட்டு வருகிறார். எப்படியாவது மு.க.ஸ்டாலினை சட்டமன்ற உறுப்பினராக்க வேண்டும் என்பதில் திமுக தலைமை தீவிரமாக உள்ளது. சமீபத்தில் தமிழகத்தில் தவெக மற்றும் அதிமுக தரப்பில் ஏற்பட்ட அரசியல் மாற்றங்களால் 8 தொகுதிகளுக்கு இடைத்தேர்தல் வரவுள்ள நிலையில், அவை அனைத்தும் மாற்றுக்கட்சியினருக்குச் செல்வாக்கான இடங்கள் என்பதால் அங்கு ஸ்டாலினைப் போட்டியிட வைக்க திமுக தயக்கம் காட்டி வருகிறது.

இந்தச் சூழலில், திமுகவின் அசைக்க முடியாத கோட்டையாகக் கருதப்படும் திருவாரூர் சட்டமன்றத் தொகுதியில் மு.க.ஸ்டாலினைப் போட்டியிட வைக்க அக்கட்சியின் தலைமை புதிய வியூகம் ஒன்றை வகுத்துள்ளதாகத் தெரிகிறது. கடந்த 1996-ம் ஆண்டு முதல் நடைபெற்ற அனைத்துத் தேர்தல்களிலும் திருவாரூரில் திமுகவே தொடர்ந்து தடையின்றி வெற்றி பெற்று வந்துள்ளது. மறைந்த முன்னாள் முதல்வர் மு.கருணாநிதி 2011 மற்றும் 2016 ஆகிய ஆண்டுகளில் இத்தொகுதியில் போட்டியிட்டு இருமுறை வெற்றி பெற்றார் என்பதும், இது அவரது பூர்வீகத் தொகுதி என்பதும் குறிப்பிடத்தக்கது.

தற்போது திருவாரூர் தொகுதி திமுக எம்.எல்.ஏ-வாக இருக்கும் பூண்டி கலைவாணன், கடந்த 2026 தேர்தலில் தவெக அலை வீசியபோதும் 18,148 வாக்குகள் வித்தியாசத்தில் தடம் பதியாமல் வெற்றி பெற்றார். இந்நிலையில், மு.க.ஸ்டாலின் சட்டமன்றத்திற்குள் நுழைவதற்காகத் தனது எம்.எல்.ஏ பதவியை ராஜினாமா செய்ய பூண்டி கலைவாணன் தயாராக இருப்பதாகப் பரவலான தகவல்கள் வெளியாகி வருகின்றன. கட்சியின் பாரம்பரிய பலம் மற்றும் ஸ்டாலினின் தனிப்பட்ட செல்வாக்கு ஆகியவை இணைந்து திருவாரூரில் அவருக்கு எளிதான வெற்றியைத் தேடித்தரும் என்பதால், விரைவில் அங்கு அவர் இடைத்தேர்தலைச் சந்திக்கக்கூடும் என்ற எதிர்பார்ப்பு அரசியல் வட்டாரத்தில் பரபரப்பை ஏற்படுத்தியுள்ளது.