நள்ளிரவில் புகுந்த கரடி… பற்றிக்கொண்ட தீப்பிழம்பில் சிக்கிய குடும்பம்… துப்பாக்கியுடன் பாய்ந்த அதிகாரிகள்… கொலராடோவில் பரபரப்பு…!!

அமெரிக்காவின் கொலராடோ மாகாணத்தில் உள்ள மவுண்ட் கிரெஸ்டட் பட் பகுதியில் கடந்த ஆகஸ்ட் 19-ம் தேதி இரவு, வீடு ஒன்றின் கண்ணாடி ஜன்னலை உடைத்துக்கொண்டு கரடி ஒன்று உள்ளே புகுந்தது. வீட்டிற்குள் நுழைந்த அந்த கரடி, அங்கிருந்த குளிர்சாதனப் பெட்டி, அலமாரிகள் மற்றும் பாத்திரங்களை அடித்து நொறுக்கி சேதத்தை ஏற்படுத்தியது. மேலும், சமையலறையில் இருந்த மின்சார அடுப்பை அது எதிர்பாராதவிதமாகத் தட்டிவிட்டதால் திடீர் தீ விபத்து ஏற்பட்டு வீடு முழுவதும் புகைமூட்டம் உருவானது.

இந்த ஆபத்தான நிலை குறித்து வீட்டிலிருந்தவர்கள் உடனடியாக 911 என்ற எண்ணிற்குத் தொடர்புகொண்டு தீயணைப்புத் துறையினருக்குத் தகவல் கொடுத்தனர். சம்பவ இடத்திற்கு விரைந்து வந்த மீட்புப் படையினர், ஆக்ரோஷமாக இருந்த கரடியை விரட்டிவிட்டு தீயை அணைக்க முயன்றனர். ஆனால், கரடி அங்கிருந்து நகர மறுத்ததாலும், உள்ளே சிக்கியிருந்த குடும்பத்தினரின் உயிரைக் காப்பாற்ற வேறு வழியில்லாததாலும் தீயணைப்பு வீரர்கள் அதனைத் துப்பாக்கியால் சுட்டுக் கொன்றனர். அதன் பின்னரே தீ முற்றிலுமாக அணைக்கப்பட்டு, வீட்டிற்குள் தவித்தவர்கள் பத்திரமாக மீட்கப்பட்டனர்.