நாடே அதிரும் நரபலி கொடூரம்…. 16 வயது சிறுவனை கொன்று ரத்தத்தை குடித்த கொடூரன்… மூளையைச் சாப்பிட முயன்ற சைக்கோ நபர் கைது….!

மத்தியப் பிரதேச மாநிலம் தாமோ மாவட்டத்தில் நடந்த ஒரு கொடூரமான கொலைச் சம்பவம், ஒட்டுமொத்தப் பகுதியையும் பெரும் அதிர்ச்சியில் ஆழ்த்தியுள்ளது. தனது சகோதரியைப் பார்க்கச் சென்ற 16 வயது சிறுவன் பரத் விஸ்வகர்மா என்பவரை, குட்டா படேல் என்ற நபர் சுத்தியலால் தலையில் கடுமையாகத் தாக்கி படுகொலை செய்தார். சகோதரத்துவப் பண்டிகையான ‘ஹோலி பாய் தூஜ்’ நாளில் நடந்த இந்தச் சம்பவம், அப்பகுதியில் பெரும் சோகத்தை ஏற்படுத்தியுள்ளது.

கொலை செய்ததோடு நில்லாமல், குட்டா படேல் மிகக் கொடூரமாகச் செயல்பட்டதுதான் இந்தச் சம்பவத்தின் உச்சக்கட்ட அதிர்ச்சியாக உள்ளது. சிறுவனைத் தாக்கிய பிறகு, அவனது தலையிலிருந்து வழிந்த ரத்தத்தை அந்த நபர் குடித்ததுடன், அவனது மூளையைப் பிடுங்கி சாப்பிடவும் முயன்றுள்ளார். அங்கிருந்த கிராம மக்கள் இதைப் பார்த்து அதிர்ச்சியில் உறைந்து போயினர். அவர்கள் கூச்சலிட்டதைக் கண்டு பயந்துபோன அந்த நபர், அங்கிருந்து தப்பித்து ஓட முயன்றார்.

உடனடியாகச் செயல்பட்ட கிராம மக்கள், அந்த கொடூரக் குற்றவாளியைத் துரத்திச் சென்று மடக்கிப் பிடித்து காவல்துறையினரிடம் ஒப்படைத்தனர். காவல்துறையினர் குட்டா படேல் மீது வழக்குப்பதிவு செய்து விசாரணை நடத்தி வருகின்றனர். விசாரணையில், ஏற்கெனவே தனது மனைவியைக் கொன்ற குற்றத்திற்காகச் சிறைக்குச் சென்று, சமீபத்தில் தான் அவர் வெளியே வந்தவர் என்ற திடுக்கிடும் தகவல் தெரியவந்துள்ளது.

சிறுவனுக்கும் குற்றவாளிக்கும் இடையே எந்தவித முன்விரோதமும் இல்லை என்று காவல்துறை தரப்பில் தெரிவிக்கப்பட்டுள்ளது. எவ்வித காரணமும் இன்றி ஒரு சிறுவனை மிகக் கொடூரமான முறையில் கொலை செய்து, அநாகரிகமான செயலில் ஈடுபட்ட இந்த நபரின் செயல், மனிதத்தன்மையற்றதாகக் கருதப்படுகிறது. இந்த விவகாரம் குறித்து காவல்துறையினர் தீவிர விசாரணை மேற்கொண்டு வருகின்றனர்.