நடுக்கடலில் யூ-டர்ன் போட்ட கப்பல்… இந்தியாவுக்கு வராமல் சீனாவுக்கு ரூட்டை மாற்றிய ‘பிங் ஷுன்’… அதிர்ச்சியில் உலக நாடுகள்…!

மத்திய கிழக்கு பிராந்தியத்தில் நிலவி வரும் போர் பதற்றங்களுக்கு இடையே, கச்சா எண்ணெய் மற்றும் எல்பிஜி விநியோகத்தை உறுதி செய்ய இந்திய அரசு தீவிர நடவடிக்கைகளை மேற்கொண்டு வருகிறது. குறிப்பாக, உலக வர்த்தகத்தின் முக்கிய வழித்தடமான ஹார்முஸ் ஜலசந்தியை ஈரான் தனது கட்டுப்பாட்டில் வைத்துள்ளதால், கப்பல் போக்குவரத்து பெரும் சவாலாக மாறியுள்ளது. இந்தியா போன்ற நட்பு நாடுகளின் கப்பல்களை அனுமதிப்பதாக ஈரான் அறிவித்த போதிலும், நடைமுறை சிக்கல்களால் சுமார் 14 முதல் 18 இந்திய கப்பல்கள் அங்கு சிக்கியிருப்பதாகக் கூறப்படுகிறது.

இந்த இக்கட்டான சூழலில், குஜராத் மாநிலம் வாடினர் துறைமுகத்திற்கு வர வேண்டிய ‘பிங் ஷுன்’ (Ping Shun) என்ற கச்சா எண்ணெய் கப்பல், திடீரென தனது பயணப் பாதையை மாற்றி சீனாவை நோக்கிச் சென்றது பெரும் பரபரப்பை ஏற்படுத்தியுள்ளது. அஃப்ராமக்ஸ் (Aframax) வகையைச் சேர்ந்த இந்த கப்பல், சுமார் 1.20 லட்சம் லிட்டர் கச்சா எண்ணெய்யை சுமந்து செல்லும் திறன் கொண்டது. 2025-இல் அமெரிக்காவால் பொருளாதாரத் தடை விதிக்கப்பட்ட இக்கப்பல், திடீரென நடுக்கடலில் ‘யூ-டர்ன்’ அடித்து சீனாவின் டோங்கியிங் துறைமுகத்தை நோக்கித் திரும்பியுள்ளது.

கப்பல் கண்காணிப்பு நிறுவனமான கெப்லர் தகவல்படி, எஸ்வதினி நாட்டைச் சேர்ந்த இக்கப்பல் ஏப்ரல் 4-ஆம் தேதி இந்தியாவை வந்தடையத் திட்டமிடப்பட்டிருந்தது. இருப்பினும், கடைசி நேரத்தில் கச்சா எண்ணெய் விலை மாற்றம், காப்பீடு (Insurance) சிக்கல்கள் அல்லது ஆவணங்கள் தொடர்பான தொழில்நுட்பக் காரணங்களால் கப்பலின் திசை மாற்றப்பட்டிருக்கலாம் என வல்லுநர்கள் கருதுகின்றனர். இது தொடர்பாக இந்திய அரசுக்கு இதுவரை அதிகாரப்பூர்வமான விளக்கம் எதுவும் அளிக்கப்படவில்லை என்பது குறிப்பிடத்தக்கது.

வளைகுடா மோதலால் சர்வதேச சந்தையில் கச்சா எண்ணெய் விலை உயர்ந்து வரும் நிலையில், அதைச் சீர்செய்ய ஈரான் கச்சா எண்ணெய்யை விற்பனை செய்ய அமெரிக்கா சமீபத்தில் அனுமதி அளித்திருந்தது. இத்தகைய உலகளாவிய பொருளாதார நெருக்கடிகளுக்கு இடையே, இந்தியாவை நோக்கி வந்த கப்பல் சீனாவுக்குத் திசை மாறியிருப்பது எரிசக்தி பாதுகாப்பில் புதிய சவால்களை உருவாக்கியுள்ளது. இருப்பினும், உள்நாட்டுத் தேவையைப் பூர்த்தி செய்ய மாற்று வழிகளை மத்திய அரசு தொடர்ந்து ஆராய்ந்து வருகிறது.