“அமமுக கூடாரம் காலி.. ஒரே நாளில் 80+ நிர்வாகிகள் திமுகவில் ஐக்கியம்”… தினகரன் தலையில் இடியை இறக்கிய ஸ்டாலின்…!

அமமுக மாநிலத் தலைவரும் முன்னாள் எம்.எல்.ஏ-வுமான என்.ஜி.பார்த்திபன் மற்றும் 80-க்கும் மேற்பட்ட முக்கிய நிர்வாகிகள் திமுக தலைவர் மு.க.ஸ்டாலின் முன்னிலையில் அண்ணா அறிவாலயத்தில் அக்கட்சியில் இணைந்தனர். சோளிங்கர் தொகுதி ஒதுக்கீடு தொடர்பாக ஏற்பட்ட அதிருப்தியே இந்த அதிரடி அரசியல் மாற்றத்திற்கு முக்கியக் காரணமாகப் பார்க்கப்படுகிறது. அதிமுக ஆட்சியில் டிடிவி தினகரனுக்கு ஆதரவாகச் செயல்பட்டதற்காகத் தகுதி நீக்கம் செய்யப்பட்ட 18 எம்.எல்.ஏ-க்களில் என்.ஜி.பார்த்திபனும் ஒருவர் என்பது குறிப்பிடத்தக்கது.

தற்போதைய மக்களவைத் தேர்தலில் அதிமுக தலைமையிலான தேசிய ஜனநாயகக் கூட்டணியில் அமமுக இணைந்த நிலையில், சோளிங்கர் தொகுதி பாமகவுக்கு ஒதுக்கப்பட்டது. முன்னதாகவே அத்தொகுதியின் வேட்பாளராகப் பார்த்திபனை தினகரன் அறிவித்திருந்த நிலையில், கூட்டணிப் பேச்சுவார்த்தையில் அந்தத் தொகுதி கைநழுவிப் போனது பார்த்திபனிடம் கடும் அதிருப்தியை ஏற்படுத்தியது. தனது ஆதரவாளர்களுடன் ஆலோசனையில் ஈடுபட்ட அவர், அமமுகவிலிருந்து விலகும் முடிவை எடுத்து தற்போது திமுகவில் ஐக்கியமாகியுள்ளார்.

இந்த இணைப்பு விழாவின் போது, அமமுக மாநில தேர்தல் பிரிவு செயலாளர் மற்றும் செங்கல்பட்டு தெற்கு மாவட்டச் செயலாளர் எம்.கோதண்டபாணி (Ex.MLA), மாநில இளம்பெண்கள் பாசறை செயலாளர் என்.ஷோபனா நடராஜன் உள்ளிட்ட பல மூத்த நிர்வாகிகள் திமுகவில் இணைந்தனர். மேலும், மாவட்ட அவைத்தலைவர்கள், ஒன்றியச் செயலாளர்கள், நகர மற்றும் பேரூராட்சி செயலாளர்கள் என ஒரு பெரும் படையே அண்ணா அறிவாலயத்தில் அணிவகுத்தது. குறிப்பாக நெமிலி, சோளிங்கர், அரக்கோணம் மற்றும் பள்ளிப்பட்டு பகுதிகளில் உள்ள முக்கியப் பொறுப்பாளர்கள் திமுகவுக்குத் தாவியுள்ளனர்.

அமமுகவின் தகவல் தொழில்நுட்பப் பிரிவு, வழக்கறிஞர் பிரிவு, மாணவர் அணி என அனைத்து மட்டங்களிலும் உள்ள நிர்வாகிகள் திமுகவில் இணைந்திருப்பது, வேலூர் மற்றும் ராணிப்பேட்டை மாவட்ட அரசியல் களத்தில் அமமுகவுக்குப் பலத்த பின்னடைவாகக் கருதப்படுகிறது. முதலமைச்சர் மு.க.ஸ்டாலின் முன்னிலையில் நடைபெற்ற இந்த நிகழ்வு, தேர்தல் நெருங்கும் வேளையில் திமுகவின் பலத்தை மேலும் அதிகரித்துள்ளதாக அரசியல் விமர்சகர்கள் கருதுகின்றனர்.