கள்ளக்காதலுக்காக பெற்ற மகனையே கொலையாளியாக்கிய தாய்…. சேலத்தை உலுக்கிய செங்கல் சூளை அதிபர் கொலை வழக்கு… திடுக்கிடும் உண்மை….!

சேலம் மாவட்டம் ஓமலூரைச் சேர்ந்த செங்கல் சூளை அதிபர் பூபதி (45) என்பவர் அண்மையில் கொடூரமான முறையில் வெட்டிக் கொலை செய்யப்பட்டார். இந்தச் சம்பவம் குறித்து வழக்குப் பதிவு செய்த காவல்துறையினர் தீவிர விசாரணை மேற்கொண்டனர். கணவர் பூபதியைக் மர்மக் கும்பல் வழிமறித்துக் கொலை செய்து நகைகளைக் கொள்ளையடித்துச் சென்றுவிட்டதாக அவரது மனைவி சுஜிதாஸ்ரீ நாடகமாடி வந்த நிலையில், அவரது முன்னுக்குப் பின் முரணான பதில்கள் காவல்துறையினருக்கு பலத்த சந்தேகத்தை ஏற்படுத்தின.

இதையடுத்து, சுஜிதாஸ்ரீயிடம் காவல்துறையினர் நடத்திய தீவிர விசாரணையில், சினிமா பாணியில் திட்டமிட்டு நடத்தப்பட்ட இந்தக் கொலையின் திடுக்கிடும் பின்னணி வெளிச்சத்திற்கு வந்தது. பூபதியின் தொழில் சார்ந்த நண்பர்களுடனும், எதிர்வீட்டில் வசித்து வந்த சந்தோஷ் ராஜ் என்பவருடனும் சுஜிதாஸ்ரீ திருமணம் மீறிய உறவில் இருந்துவந்துள்ளார். இந்தத் தகாத உறவைக் கண்டித்து கணவர் பூபதி அடிக்கடி வாக்குவாதத்தில் ஈடுபட்டு வந்ததால், அவரை வழியிலிருந்து அகற்ற சுஜிதாஸ்ரீ திட்டம் தீட்டியுள்ளார்.

சம்பவத்தன்று கணவருடன் ஏற்பட்ட தகராறில், பூபதியின் தலையில் பலமாகத் தாக்கி அவரை மயக்கமடையச் செய்துள்ளார். பின்னர், தனது கள்ளக்காதலன் சந்தோஷ் ராஜை வீட்டிற்கு வரவழைத்து, மயங்கிய நிலையில் இருந்த பூபதியை கத்தியால் சரமாரியாகக் குத்திக் கொலை செய்துள்ளனர். இந்த கொடூரமான செயலில் சுஜிதாஸ்ரீ தனது 13 வயது மகனையும் ஈடுபடுத்தியிருப்பது காவல்துறை விசாரணையில் தெரியவந்து பெரும் அதிர்ச்சியை ஏற்படுத்தியுள்ளது.

கொலையை மறைப்பதற்காகவே காரில் செல்லும் போது மர்மக் கும்பல் தாக்கியதாக பொய்யான நாடகத்தை சுஜிதாஸ்ரீ அரங்கேற்றியுள்ளார். தற்போது இச்சம்பவம் தொடர்பாக சுஜிதாஸ்ரீ மற்றும் சந்தோஷ் ராஜ் ஆகிய இருவரையும் ஓமலூர் காவல்துறையினர் கைது செய்துள்ளனர். மேலும், இக்கொலையில் தொடர்புடைய அவர்களின் 13 வயது சிறுவன் அரசு கூர்நோக்கு இல்லத்திற்கு அனுப்பி வைக்கப்பட்டான்.