“குடும்பத்தை கொலை செய்வது எப்படி?”… AI-யிடம் கேட்ட 17 வயது இளைஞன்… இந்திய வம்சாவளி மாணவன் செய்த செயல்… பதற வைக்கும் பகீர் பின்னணி…!!

அமெரிக்காவின் மாசசூசெட்ஸ் மாகாணத்தில் உள்ள ஆக்டன் நகரில், 17 வயதான இந்திய வம்சாவளி சிறுவன் அர்ஜுன் அரவிந்த் தனது தாய் மற்றும் தம்பியை கொலை செய்த குற்றச்சாட்டில் கைதாகியுள்ளார். மாலை நேரத்தில் வீட்டிற்கு வந்த டியூட்டரால் குடும்பத்தினரை தொடர்புகொள்ள முடியாத நிலை ஏற்பட்டதால், போலீசாரிடம் தகவல் தெரிவிக்கப்பட்டது. இதனையடுத்து வீட்டிற்குள் சென்று பார்த்தபோது, அர்ஜுனின் தாயும் 14 வயது தம்பியும் சடலமாக மீட்கப்பட்டனர். சம்பவத்திற்குப் பிறகு தாயின் காரில் தப்பியோடிய அர்ஜுன், அடுத்த நாள் அதிகாலையில் வேறு ஒரு பகுதியில் வைத்து போலீசாரால் எவ்வித எதிர்ப்பும் இன்றி கைது செய்யப்பட்டார்.

இந்த வழக்கில் மிகவும் அதிர்ச்சியளிக்கும் திருப்பமாக அர்ஜுனின் இணையதள தேடல்கள் அமைந்துள்ளன. அவர் சாட்ஜிபிடி போன்ற செயற்கை நுண்ணறிவு தொழில்நுட்பத்தைப் பயன்படுத்தி, குடும்பத்தினரை கொலை செய்வது தொடர்பான இருண்ட கற்பனைக் கதைகள் மற்றும் அதற்கான சூழல்களைத் தேடியுள்ளது விசாரணையில் அம்பலமாகியுள்ளது. இருப்பினும், இத்தகைய இணையத் தேடல்கள் மட்டுமே ஒருவரை குற்றவாளியாக்கிவிடாது என்பதால், இந்த தேடல்களுக்கும் உண்மையான கொலைக்கும் நேரடி தொடர்பு உள்ளதா என்பதை காவல்துறையினர் தீவிரமாக விசாரித்து வருகின்றனர்.

அர்ஜுன் மீது இரட்டை கொலை வழக்கு, கொடூரமான தாக்குதல் மற்றும் கார் திருட்டு உள்ளிட்ட பல கடுமையான பிரிவுகளின் கீழ் குற்றச்சாட்டுகள் பதிவு செய்யப்பட்டுள்ளன. அவர் 17 வயது நிரம்பியவர் என்பதால், கொலை வழக்கை சிறார் நீதிமன்றம் விசாரிக்க முடியாது எனத் தெரிவிக்கப்பட்டுள்ளது. இந்த துயர சம்பவம், ஒரு குடும்பத்தின் பேரிழப்பைத் தாண்டி, பதின்ம வயதினரின் டிஜிட்டல் செயல்பாடுகள் மற்றும் AI தொழில்நுட்பங்களின் தாக்கம் குறித்த ஒரு பெரிய சமூக விவாதத்தையும் தற்போது பேசுபொருளாக்கியுள்ளது.