ஆன்லைன் டிரேடிங் ஆசை… ரூ.13 லட்சம் அவுட்…! ஓட்டுநருக்கு வலைவிரித்த வாலிபர்… பரபரப்பு பின்னணி…!!

மயிலாடுதுறையைச் சேர்ந்த நபர் ஒருவர் துபாயில் ஓட்டுநராகப் பணிபுரிந்து வந்த நிலையில், முகநூல் வழியாக அறிமுகமான மர்ம நபர் ஒருவரின் ஆசை வார்த்தைகளை நம்பி ₹13 லட்சத்தை இழந்துள்ளார். ஆன்லைன் டிரேடிங் மூலம் அதிக லாபம் ஈட்டலாம் எனக் கூறி, போலியான பணப் பரிவர்த்தனை ஆதாரங்களைக் காட்டி கவியரசன் (24) என்ற வாலிபர் இந்த மோசடியைச் செய்துள்ளார். இதனை உண்மை என்று நம்பிப் பாதிக்கப்பட்ட நபர், கவியரசன் குறிப்பிட்ட வங்கிக் கணக்கிற்குப் பணத்தை அனுப்பியுள்ளார். அதன் பிறகு தொடர்பு துண்டிக்கப்பட்டதால் அதிர்ச்சியடைந்த பாதிக்கப்பட்டவரின் மனைவி, மயிலாடுதுறை சைபர் கிரைம் போலீசாரிடம் புகார் அளித்தார்.

சைபர் கிரைம் ஏடிஎஸ்பி சுரேஷ் தலைமையிலான தனிப்படை போலீசார் தீவிர விசாரணை நடத்தி, வங்கி கணக்குகளை ஆய்வு செய்ததில் குற்றவாளி புதுக்கோட்டை மாவட்டத்தைச் சேர்ந்த கவியரசன் என்பது தெரியவந்தது. புகாரளித்த 24 மணி நேரத்திற்குள் அவரைக் கைது செய்த போலீசார், அவரிடமிருந்து ₹7 லட்சத்தைப் பறிமுதல் செய்து பாதிக்கப்பட்டவரின் கணக்கில் ஒப்படைத்தனர். மீதமுள்ள பணத்தை மீட்கவும், இந்த மோசடியில் வேறு யாருக்கெல்லாம் தொடர்பு இருக்கிறது என்பது குறித்தும் விசாரணை தீவிரமடைந்துள்ளது. இச்சம்பவம் ஆன்லைன் முதலீடுகளில் பொதுமக்கள் மிகுந்த எச்சரிக்கையுடன் இருக்க வேண்டும் என்பதை நினைவூட்டுகிறது.