”எலேய்.. சமாதானம்லே”…. உங்களுக்கு சம்மதமா?… ஈரானுக்கு தூது அனுப்பிய அமெரிக்கா… பாகிஸ்தானில் நடக்கும் மெகா சமாதானம்….!

ஈரான் மீது இஸ்ரேல் மற்றும் அமெரிக்கா இணைந்து நடத்தி வரும் ராணுவத் தாக்குதல் நான்கு வாரங்களைக் கடந்துள்ள நிலையில், போர்க்களத்தில் எதிர்பாராத திருப்பங்கள் ஏற்பட்டுள்ளன. ஈரான் எளிதில் வீழ்ந்துவிடும் என்ற கணிப்புகளைப் பொய்யாக்கி, ஹார்மஸ் ஜலசந்தியை மூடி சர்வதேச கச்சா எண்ணெய் விநியோகத்தைத் தடுத்து அமெரிக்காவிற்கு ஈரான் கடும் நெருக்கடி கொடுத்துள்ளது. உலக நாடுகளின் அழுத்தத்தாலும், பொருளாதார பாதிப்புகளாலும் அதிபர் டொனால்ட் ட்ரம்ப் தற்போது 5 நாட்களுக்குத் தாக்குதல்களை நிறுத்தி வைப்பதாக அறிவித்துள்ளார்.

அமெரிக்கா மற்றும் ஈரான் இடையே சமரசப் பேச்சுவார்த்தைக்கான முயற்சிகள் திரைமறைவில் தீவிரமடைந்துள்ளதை சிபிஎஸ் (CBS) செய்திகள் உறுதிப்படுத்தியுள்ளன. அமெரிக்கா அனுப்பிய தூதுச் செய்திகளைப் பரிசீலித்து வருவதாக ஈரான் வெளியுறவு அமைச்சகம் தெரிவித்துள்ளது. குறிப்பாக, சமீபத்திய நாட்களில் இரு நாடுகளுக்கும் இடையே ஆக்கப்பூர்வமான உரையாடல்கள் நடந்துள்ளதாகவும், ஒரு உடன்பாட்டிற்கு வர நல்ல வாய்ப்பு இருப்பதாகவும் ட்ரம்ப் நம்பிக்கை தெரிவித்துள்ளார். அமெரிக்கத் தூதர் ஸ்டீவ் விட்காஃப் மற்றும் ஜாரெட் குஷ்னர் ஆகியோர் இதில் முக்கியப் பங்காற்றி வருகின்றனர்.

முன்னதாக, 48 மணி நேரத்திற்குள் ஹார்மஸ் ஜலசந்தியைத் திறக்காவிட்டால் ஈரானின் மின்சாரக் கட்டமைப்புகள் தகர்க்கப்படும் என ட்ரம்ப் விடுத்த எச்சரிக்கையை ஈரான் துணிச்சலுடன் எதிர்கொண்டது. தங்களைத் தாக்கினால் ஒட்டுமொத்த வளைகுடா நாடுகளுமே இருளில் மூழ்கும் வகையில் பதிலடி தரப்படும் என ஈரான் எச்சரித்ததைத் தொடர்ந்து, போர் தீவிரமடையும் என அஞ்சப்பட்டது. ஆனால், அந்த இறுக்கமான சூழலில் தான், தாக்குதலை ஒத்திவைத்துவிட்டு பேச்சுவார்த்தைக்குத் தயார் என்ற அறிவிப்பை அமெரிக்கா வெளியிட்டுள்ளது.

தற்போது இந்த மோதலைத் தீர்க்க பாகிஸ்தான், துருக்கி மற்றும் எகிப்து ஆகிய நாடுகள் மத்தியஸ்தர்களாகக் களம் இறங்கியுள்ளன. இந்த வாரத் தொடக்கத்தில் பாகிஸ்தான் தலைநகர் இஸ்லாமாபாத்தில் இரு நாடுகளின் உயர் மட்டப் பிரதிநிதிகள் சந்தித்துப் பேச வாய்ப்புள்ளதாக ராய்ட்டர்ஸ் செய்தி நிறுவனம் தெரிவித்துள்ளது. இதில் அமெரிக்கத் துணை அதிபர் பங்கேற்கக்கூடும் என எதிர்பார்க்கப்படும் நிலையில், இந்தச் சந்திப்பு மத்திய கிழக்கில் நிலவும் போர் மேகங்களை விலக்கி அமைதியை ஏற்படுத்துமா என்பதை உலகம் உன்னிப்பாகக் கவனித்து வருகிறது.