“என்ன சாதி.. நீ செத்தால் சாவு”…. அலட்சியம் காட்டிய போலீஸ்…. 2 குழந்தைகளுடன் ஆட்சியர் அலுவலகம் முன் தாய் செய்த அதிர்ச்சி செயல்…. கடலூரில் பதற்றம்….!

குடும்ப பிரச்சினை காரணமாக காவல் நிலையத்தில் புகார் அளித்தும் எந்தவித நடவடிக்கையும் எடுக்கப்படாததால், கடலூர் மாவட்ட ஆட்சியர் அலுவலக வாயிலில் இரு குழந்தைகளுடன் தாய் ஒருவர் பெட்ரோல் ஊற்றி தீக்குளிக்க முயன்ற சம்பவம் அப்பகுதியில் பெரும் பரபரப்பை ஏற்படுத்தியுள்ளது. பாதிக்கப்பட்ட வசந்தாமணி என்பவருக்குத் திருமணம் முடிந்த நிலையில், அவரது கணவர் தனக்குத் திருமணமாகவில்லை என்று கூறி ஏமாற்றியதுடன், தற்போது முதல் மனைவியுடன் சென்றுவிட்டார். பிள்ளைகளின் வாழ்வாதாரத்திற்காக நீதிமன்றத்தை நாடியும் எந்தப் பலனும் கிடைக்காததால், கடலூர் மாவட்ட அனைத்து மகளிர் காவல் நிலையம், பரங்கிப்பேட்டை மற்றும் ஜெயங்கொண்டம் காவல் நிலையங்களில் அவர் தொடர்ந்து புகார் அளித்துள்ளார். மேலும் மாவட்ட காவல் கண்காணிப்பாளரிடமும் இருமுறை மனு அளித்தும் உரிய நடவடிக்கை எடுக்கப்படவில்லை என்று கூறப்படுகிறது.

காவல் துறையினரின் அலட்சியத்தால் சொல்லொணாத் துயரத்திற்கு ஆளான வசந்தாமணி, தான் சந்தித்து வரும் கொடுமைகளைக் கண்ணீர் மல்க விவரித்தார். வாழ்வதற்கு வீடும் இன்றி, சாப்பாட்டிற்கும் வழியில்லாமல் அரசின் காலை உணவுத் திட்டத்தின் மூலம் கிடைக்கும் உணவை நம்பியே தனது குழந்தைகளுடன் வாழ்ந்து வருவதாக அவர் வேதனையுடன் தெரிவித்தார். மேலும், காவல் நிலையத்திற்குப் புகார் அளிக்கச் சென்றபோது, அவரது சாதியின் பெயரை குறிப்பிட்டுப் புகாரைப் பெற மறுத்ததாகவும், தற்கொலை செய்து கொள்ளப்போவதாகக் கூறியதற்கு “நீ செத்தால் சாவு” என மிகக் கொடூரமாகப் பதிலளித்ததாகவும் குற்றச்சாட்டு சுமத்தியுள்ளார். அதிகாரிகளின் இந்த மனசாட்சியற்ற போக்கு அவருக்கு கடும் மன உளைச்சலை ஏற்படுத்தியுள்ளது.

நீண்ட நாட்களாகப் போராடியும் எந்த நீதியும் கிடைக்காததால் தீவிர மன உளைச்சலுக்கு ஆளான அப்பெண், வேறு வழியின்றி கடலூர் மாவட்ட ஆட்சியர் அலுவலக வாயிலில் தனது இரண்டு குழந்தைகளுடன் திடீரென பெட்ரோல் ஊற்றித் தீக்குளிக்க முயன்றார். இதைக் கண்டு அதிர்ச்சியடைந்த அங்கிருந்த பாதுகாப்புப் பணியாளர்கள் மற்றும் பொதுமக்கள் உடனடியாகச் செயல்பட்டு அவர்களைக் காப்பாற்றினர். அதிகாரிகளின் அலட்சியப் போக்கும், சாதியின் பெயரால் இழைக்கப்பட்ட அநீதியும் ஒரு தாயை தன் குழந்தைகளுடன் தற்கொலை முடிவை நோக்கித் தள்ளிய இந்தச் சம்பவம் கடலூரில் பெரும் அதிர்வலைகளை உருவாக்கியுள்ளது.