காதலி கர்ப்பம்.. திருமணம் செய்துகொள்ள சொல்லி தகராறு.. பெண்ணை கொன்ற காதலன்… கல்லூரிக்குச் சென்ற பெண் எலும்புக்கூடாக சிக்கிய கொடூரம்…!!

லக்னோவின் புறநகர்ப் பகுதியில் உள்ள வனப்பகுதியில் சனிக்கிழமையன்று 19 வயதுப் பெண் ஒருவரின் எலும்புக்கூடு கண்டெடுக்கப்பட்டது. சீதாபூர் மாவட்டம், சந்தனாவைச் சேர்ந்த இப்பெண், கடந்த மே 25 அன்று கல்லூரிக்குச் சென்றவர் வீடு திரும்பவில்லை. இதனால் அவரது குடும்பத்தினர் அளித்த புகாரின் பேரில் கடத்தல் வழக்கு பதிவு செய்து போலீசார் விசாரணை நடத்தி வந்தனர். இந்தச் சூழலில், சீதாபூர் மாவட்டம், சரையா கிராமத்தைச் சேர்ந்த விஷால் பால் என்ற வாலிபரை போலீசார் கைது செய்து விசாரணை நடத்தினர்.

விசாரணையின் போது, தானும் அந்தப் பெண்ணும் காதலித்து வந்ததாகவும், அப்பெண் கர்ப்பமானதைத் தொடர்ந்து தன்னை திருமணம் செய்து கொள்ளுமாறு வற்புறுத்தியதாகவும் விஷால் பால் ஒப்புக்கொண்டார். இதனால் ஏற்பட்ட தகராறில், அவர் அப்பெண்ணைக் கொலை செய்து காட்டில் வீசியதாகத் தெரிவித்தார். அவர் அளித்த தகவலின் அடிப்படையில், வனப்பகுதிக்குச் சென்ற போலீசார் மண்டை ஓடு, எலும்புகள், முடி, ஆடைகள் மற்றும் செருப்பு ஆகியவற்றை மீட்டனர். மீட்கப்பட்ட உடற்பாகங்கள் மற்றும் ஆடைகளை அப்பெண்ணின் குடும்பத்தினர் அடையாளம் காட்டியுள்ள நிலையில், அவை பிரேதப் பரிசோதனை மற்றும் தடயவியல் ஆய்வுக்கு அனுப்பப்பட்டுள்ளன.

இதற்கிடையில், சனிக்கிழமையன்று கொலைக்கான ஆதாரங்களை மீட்பதற்காகக் காவல்துறையினர் விஷால் பாலை சம்பவ இடத்திற்கு அழைத்துச் சென்றனர். அப்போது இயற்கை உபாதையைக் கழிக்க அனுமதி கேட்ட அவர், திடீரென போலீசாரின் கைத்துப்பாக்கியைப் பறித்துச் சுட்டுவிட்டு தப்பிக்க முயன்றார். போலீசார் தற்காப்பிற்காகப் பதிலுக்குச் சுட்டதில் விஷால் பாலின் காலில் குண்டு காயம் ஏற்பட்டது. இதையடுத்து அவர் சிகிச்சைக்காக மருத்துவமனையில் அனுமதிக்கப்பட்டார். இச்சம்பவம் குறித்து காவல்துறையினர் மேலும் தீவிர விசாரணை நடத்தி வருகின்றனர்.