“என்னோடு வாழாட்டி யாரோடும் வாழவிடமாட்டேன்”…. நள்ளிரவில் ஜன்னல் வழியாக நுழைந்த நபர்… சென்னையில் நடந்த அதிர்ச்சி சம்பவம்…..!

சென்னை அனகாபுத்தூரில் குடும்பத் தகராறு காரணமாக, இளம் தாய் ஒருவர் அவரது அத்தை மகனால் பெப்பர் ஸ்பிரே அடித்து, கத்தியால் கொடூரமாகக் கொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. பெங்களூருவைச் சேர்ந்த ரேஷ்மா (29) என்பவருக்கு அசோக் என்ற கணவரும், இரு குழந்தைகளும் உள்ளனர். கருத்து வேறுபாடு காரணமாகக் கணவரைப் பிரிந்து, சென்னை அனகாபுத்தூர் சத்யா நகரில் தனது 8 வயது மகள் யாத்திகாவுடன் ரேஷ்மா வாடகை வீட்டில் வசித்து வந்தார். இந்தச் சூழலில், ரேஷ்மாவின் அத்தை மகனான விஜி (30) என்பவர் அடிக்கடி அங்கு வந்து சென்றுள்ளார். சமீபகாலமாக ரேஷ்மா அவரிடம் பேசுவதைத் தவிர்த்ததால் ஆத்திரமடைந்த விஜி, “என்னுடன் வாழவில்லை என்றால், யாருடனும் வாழ விடமாட்டேன்” எனச் சில தினங்களுக்கு முன்பு மிரட்டல் விடுத்துச் சென்றுள்ளார்.

விஜியின் இந்த மிரட்டலால் அச்சமடைந்த ரேஷ்மா, தனக்குத் துணையாகத் தனது தோழி மரியா மற்றும் அவரது சகோதரி ஜெனிபர் ஆகியோரைத் தனது வீட்டில் தங்க வைத்துள்ளார். இந்நிலையில், நேற்று அதிகாலை ரேஷ்மாவின் வீட்டிற்கு வந்த விஜி கதவைத் தட்டியுள்ளார். உள்ளே இருந்தவர்கள் பயந்துபோய் கதவைத் திறக்க மறுத்ததால், ஆத்திரமடைந்த விஜி ஜன்னல் வழியாகக் கையை விட்டு வீட்டின் கதவைத் திறந்து உள்ளே நுழைந்துள்ளார். உடனே தான் மறைத்து வைத்திருந்த ‘பெப்பர் ஸ்பிரே’வை அங்கு இருந்தவர்கள் மீது அடித்து நிலைகுலையச் செய்த விஜி, கத்தியால் ரேஷ்மாவின் கை, கால் மற்றும் கழுத்துப் பகுதிகளில் சரமாரியாக வெட்டியுள்ளார்.

இந்தக் கொடூரத் தாக்குதலில் படுகாயமடைந்து இரத்த வெள்ளத்தில் சரிந்த ரேஷ்மா, சம்பவ இடத்திலேயே பரிதாபமாக உயிரிழந்தார். இதுகுறித்துத் தகவல் அறிந்து விரைந்து வந்த சங்கர் நகர் காவல் துறையினர், ரேஷ்மாவின் உடலைக் கைப்பற்றிப் பிரேத பரிசோதனைக்காகத் தாம்பரம் மாவட்ட அரசு மருத்துவமனைக்கு அனுப்பி வைத்தனர். இக்கொலைச் சம்பவம் தொடர்பாகப் போலீசார் வழக்குப் பதிவு செய்து, தலைமறைவாக உள்ள கொலையாளி விஜியைத் தீவிரமாகத் தேடி வருகின்றனர். அவர் கைது செய்யப்பட்ட பிறகே இந்தத் துயரச் சம்பவத்தின் பின்னணியில் உள்ள முழுமையான உண்மை விபரங்கள் தெரியவரும் என அதிகாரிகள் தரப்பில் தெரிவிக்கப்பட்டுள்ளது.