அடச்சீ..! பிரசவ வலியில் உயிருக்குப் போராடிய மனைவி.. ரத்தப்போக்கின் போது டயப்பர் விளம்பரம் செய்த கணவர்… பணத்துக்காக இப்படியா..? இணையத்தில் கடும் கொந்தளிப்பு..!!

அமெரிக்காவின் சியாட்டிலில் வசிக்கும் ‘பால் இன் யுஎஸ்ஏ’ (Paul in USA) என்றழைக்கப்படும் பிரபல சீன இன்ஃப்ளூயன்ஸர், தனது மனைவியின் 23 மணிநேர பிரசவ காலத்தை வீடியோவாகப் படம்பிடித்து வெளியிட்டது இணையதளங்களில் பெரும் சர்ச்சையை ஏற்படுத்தியுள்ளது. கொலம்பியா பல்கலைக்கழகத்தில் பட்டம் பெற்று, மைக்ரோசாஃப்ட் நிறுவனத்தில் தயாரிப்பு மேலாளராகப் பணியாற்றிய இவர், தற்போது 12 மில்லியனுக்கும் அதிகமான ஃபாலோயர்களைக் கொண்டுள்ளார். அந்த வீடியோவில் அவரது மனைவி பிரசவ வலியால் துடிப்பது, மருத்துவக் சிக்கல்கள் மற்றும் அதிகப்படியான ரத்தப்போக்கு ஆகியவற்றையும் அவர் படம்பிடித்துள்ளார்.

இந்தச் செயல் இணையவாசிகளிடையே கடும் கொந்தளிப்பை ஏற்படுத்தியதற்குக் காரணம், அந்த வீடியோவின் நடுவே அவர் ஒரு பிரபல டயப்பர் பிராண்டுக்கான விளம்பரத்தை இணைத்ததே ஆகும். அவரது மனைவி உயிருக்கு ஆபத்தான நிலையில் ரத்த மாற்றும் சிகிச்சையைப் பெற்றுக்கொண்டிருந்த போதே, பால் கேமராவைப் பார்த்து அந்தப் பொருளுக்கான விளம்பர உரையை வாசித்ததாகக் கூறப்படுகிறது. பணத்துக்காகவும் பார்வைகளுக்காகவும் தனது மனைவியின் அந்தரங்கத்தையும் வலியையும் அவர் பயன்படுத்திக்கொண்டார் என நெட்டிசன்கள் அவரை “வெட்கமற்றவர்” என்று கடுமையாக விமர்சித்து வருகின்றனர்.

இந்தச் சர்ச்சையைத் தொடர்ந்து, ‘டூயின்’ (Douyin) மற்றும் ‘வீபோ’ (Weibo) போன்ற சீன சமூக வலைதளங்கள் பாலின் கணக்குகளைத் தற்காலிகமாக முடக்கியுள்ளன. தனிமனித அந்தரங்கம் மற்றும் வர்த்தக நெறிமுறைகளை மீறியதற்காக இந்த நடவடிக்கை எடுக்கப்பட்டுள்ளது. இதற்கிடையில், பாலின் மனைவி தனது கணவருக்கு ஆதரவாக ஒரு அறிக்கையை வெளியிட்டுள்ளார். அதில், பிரசவத்தின் போது ஏற்படும் அபாயங்களைப் பற்றி விழிப்புணர்வு ஏற்படுத்தவே அந்த வீடியோ எடுக்கப்பட்டது என்று அவர் தெரிவித்துள்ளார். இருப்பினும், சமூக ஊடகங்களில் அவரது செயல்பாடுகள் குறித்த விவாதம் இன்னும் ஓய்ந்தபாடில்லை.