அடகடவுளே..! பன்றிக்காக போட்ட திட்டம்… தந்தை, மகன் அடுத்தடுத்து துடிதுடித்து பலி… கதறும் குடும்பம்… பதறவைக்கும் சம்பவம்…!!

வேலூர் மாவட்டம் பேரணாம்பட்டு அடுத்த பல்லலகுப்பம் துலுக்கன்குட்டை பகுதியைச் சேர்ந்த விவசாயி ரங்கநாதன், பயிர்களைக் காட்டுப்பன்றிகள் பாழாக்குவதைத் தடுப்பதற்காகத் தனது விவசாய நிலத்தைச் சுற்றி சட்டவிரோதமாக மின்வேலி அமைத்திருந்தார். அப்பகுதியில் குடும்பத்துடன் தங்கி விவசாயம் செய்து வந்த நிலையில், இவரது மகன் சுரேஷ் கால்நடைகளைப் பராமரித்து பால் வியாபாரம் செய்து வந்தார்.

அப்பகுதியில் பலத்த மழை பெய்து ஓய்ந்த பிறகு, நிலத்தில் இருந்த மின்வேலிக்கு அருகே கிடந்த கூடை ஒன்றை எடுக்க ரங்கநாதன் சென்றுள்ளார். அப்போது எதிர்பாராதவிதமாக அவரது கை மின்வேலியில் பட்டதால், பலத்த மின்சாரம் தாக்கி அவர் சம்பவ இடத்திலேயே பரிதாபமாகத் துடிதுடித்து உயிரிழந்தார். அருகில் மாடு கறந்து கொண்டிருந்த மகன் சுரேஷ், தந்தையைக் காப்பாற்றும் நோக்கில் தென்னை மட்டையுடன் விரைந்து வந்து மீட்க முயன்றபோது, அவரது காலிலும் மின்கம்பி சிக்கியதால் அவரும் மின்சாரம் பாய்ந்து அதே இடத்தில் உயிரிழந்தார்.

கண் முன்னே அடுத்தடுத்து தந்தை, மகன் இருவரும் மின்சாரம் தாக்கி உயிரிழந்ததைக் கண்டு அவர்களது குடும்பத்தினர் கதறி அழுதனர். இச்சம்பவம் குறித்துத் தகவல் அறிந்து வந்த பேரணாம்பட்டு மற்றும் மேல்பட்டி காவல்துறையினர், இருவரின் உடல்களையும் மீட்டு உடற்கூறு ஆய்வுக்காகக் குடியாத்தம் அரசு மருத்துவமனைக்கு அனுப்பி வைத்தனர். மேலும் வட்டாட்சியர் உள்ளிட்ட அதிகாரிகள் நேரில் சென்று இத்துயரச் சம்பவம் தொடர்பாக விசாரணை மேற்கொண்டு வருகின்றனர்.