“பள்ளி மாணவிகளுக்கு மாதந்தோறும் 3 நாட்கள் மாதவிடாய் லீவ்..!” கேரள ஆளுநரின் அதிரடி அறிவிப்பு..!

கேரளாவில் அண்மையில் நடந்து முடிந்த சட்டமன்றத் தேர்தலில் காங்கிரஸ் தலைமையிலான ஐக்கிய ஜனநாயக முன்னணி வெற்றி பெற்று ஆட்சியைப் பிடித்துள்ளது. இதன் மூலம் காங்கிரஸ் தலைவர் வி.டி. சதீசன் கேரளாவின் புதிய முதலமைச்சராகப் பொறுப்பேற்றுள்ளார். புதிய அரசு பொறுப்பேற்றுள்ள நிலையில், அரசின் கொள்கை விளக்கங்கள் மற்றும் திட்டங்கள் குறித்தான உரையை கேரள சட்டசபையில் அம்மாநில ஆளுநர் ராஜேந்திர விஸ்வநாத் அர்லேகர் நிகழ்த்தினார்.

ஆளுநர் தனது உரையின் போது, மாணவிகளின் நலன் மற்றும் ஆரோக்கியத்தில் அரசு கொண்டுள்ள அக்கறையை வெளிப்படுத்தும் விதமாக ‘மாதவிடாய் கண்ணியம்’ (Menstrual Dignity) என்ற புதிய திட்டத்தை அறிவித்தார். இத்திட்டத்தின் கீழ், கேரளாவில் உள்ள பள்ளி மாணவிகளுக்கு மாதந்தோறும் 3 நாட்கள் மாதவிடாய் விடுமுறை வழங்கப்படும் என்று அவர் தெரிவித்தார். மேலும், இந்த விடுமுறை நாட்களில் மாணவிகள் தவறவிடும் பாடங்களை ஈடு செய்யும் வகையில், வார இறுதி நாட்களில் (சனி, ஞாயிறு) அவர்களுக்கு சிறப்பு வகுப்புகள் நடத்த ஏற்பாடு செய்யப்படும் என்றும் குறிப்பிட்டார்.

கேரள அரசின் இந்த அதிரடி மற்றும் முற்போக்கான அறிவிப்பு பெண்களிடையேயும், சமூக ஆர்வலர்களிடையேயும் பெரும் வரவேற்பைப் பெற்றுள்ளது. கேரளாவைப் பின்பற்றி, இந்தியாவின் மற்ற அனைத்து மாநிலங்களிலும் உள்ள பள்ளி மாணவிகளுக்கும் மாதந்தோறும் 3 நாட்கள் மாதவிடாய் விடுப்பு வழங்க மத்திய, மாநில அரசுகள் நடவடிக்கை எடுக்க வேண்டும் என்ற கோரிக்கையும் தற்போது வலுவாக எழுந்து வருகிறது.