“ப்ளீஸ் வேண்டாம்…. என்னை வாழ விடுங்க”…. நடுரோட்டில் துடிதுடித்த 2 குழந்தைகளின் தாய்…. தாலி கட்டிய பொண்டாட்டிணு கூட பார்க்காமல்.. அண்ணனும், கணவரும் மாறி மாறி…..!

விருதுநகர் மாவட்டம் ராஜபாளையம் அருகே உள்ள சொக்கநாதன்புத்தூரைச் சேர்ந்தவர் பூமிராஜா (39). இவருக்குச் செல்வராணி (35) என்ற மனைவியும் இரு மகள்களும் உள்ளனர். குடும்ப வாழ்க்கையின் இடையே பூமிராஜாவுக்கு வேறொரு பெண்ணுடன் கள்ளக்காதல் ஏற்பட்டுள்ளது. இவர்களது சட்டவிரோத உறவு குறித்து அறிந்த செல்வராணி, கணவருடன் ஏற்பட்ட கருத்து வேறுபாடு காரணமாகத் தனது மகள்களை அழைத்துக்கொண்டு தனியாக வாழத் தொடங்கினார்.

மனைவி பிரிந்து சென்றபோதிலும், பூமிராஜாவும் அவரது குடும்பத்தினரும் செல்வராணியை மீண்டும் சேர்ந்து வாழுமாறு கூறித் தொடர் துன்புறுத்தலில் ஈடுபட்டு வந்ததாகக் கூறப்படுகிறது. இக்கொடுமைகள் பொறுக்க முடியாமல் செல்வராணி சேத்தூர் காவல் நிலையத்தில் புகார் அளித்தார். புகாரின் பேரில் காவல்துறையினர் வழக்குப் பதிவு செய்து விசாரணை மேற்கொண்டு வந்த நிலையில், தம்பதியிடையே நிலவி வந்த பிரச்சனை மேலும் தீவிரமடைந்தது.

இந்நிலையில், காமராஜர் நகர் பழைய தியேட்டர் அருகே செல்வராணி சக்கர வாகனத்தில் சென்று கொண்டிருந்தபோது, பூமிராஜாவும் அவரது அண்ணன் ஐயப்பனும் அவரை வழிமறித்து தகராறில் ஈடுபட்டுள்ளனர். வாக்குவாதம் முற்றிய நிலையில், இருவரும் தாங்கள் மறைத்து வைத்திருந்த கத்தியால் செல்வராணியைச் சரமாரியாகக் குத்தினர். இதில் பலத்த காயமடைந்து அலறிய செல்வராணியை மீட்டு அக்கம் பக்கத்தினர் அரசு மருத்துவமனைக்கு அனுப்பி வைத்தனர்; ஆனால் அவர் வழியிலேயே உயிரிழந்துவிட்டதாக மருத்துவர்கள் தெரிவித்தனர்.

இக்கொடூர சம்பவம் குறித்து செல்வராணியின் மகள் அளித்த புகாரின் பேரில் சேத்தூர் ஊரகக் காவல்துறையினர் சம்பவ இடத்திற்கு விரைந்து வந்து உடலைக் கைப்பற்றிப் பிரேதப் பரிசோதனைக்கு அனுப்பி வைத்தனர். இக்கொலை வழக்கு தொடர்பாகப் பூமிராஜா மற்றும் ஐயப்பன் ஆகிய இருவரையும் கைது செய்த காவல்துறையினர், அவர்களை நீதிமன்றத்தில் ஆஜர்படுத்திச் சிறையில் அடைத்தனர். அண்ணனுடன் சேர்ந்து மனைவியைக் கணவனே கொடூரமாகக் கொலை செய்த இச்சம்பவம் அப்பகுதியில் பெரும் அதிர்ச்சியையும் சோகத்தையும் ஏற்படுத்தியுள்ளது.