“இனி தப்பவே முடியாது”…. அரிவாள் வெட்டு ரவுடி, புதுச்சேரி சாராய அழகி… மயிலாடுதுறை எஸ்பி தூக்கிய ‘குண்டாஸ்’ சாட்டை…!

மயிலாடுதுறை மாவட்டத்தில் குற்றச் சம்பவங்களைக் கட்டுப்படுத்தவும், பொதுமக்களின் அமைதியான வாழ்க்கையை உறுதி செய்யவும் மாவட்ட காவல்துறை சார்பில் தீவிர நடவடிக்கைகள் எடுக்கப்பட்டு வருகின்றன. இதன் ஒரு பகுதியாக, பொது அமைதிக்கு பங்கம் விளைவிக்கும் வகையில் தொடர்ந்து குற்றச் செயல்களில் ஈடுபட்டு வந்த இருவர் மீது குண்டர் தடுப்பு காவல் சட்டத்தின் கீழ் நடவடிக்கை எடுக்கப்பட்டு, அவர்கள் சிறையில் அடைக்கப்பட்டுள்ளனர். இதில் ஒருவர் போக்சோ சரித்திர பதிவேடு குற்றவாளி, மற்றொருவர் சட்டவிரோத மதுவிலக்கு குற்றங்களில் ஈடுபட்டு வந்த பெண் என்பது குறிப்பிடத்தக்கது.

முதல் சம்பவத்தில், கடந்த செப்டம்பர் 16-ஆம் தேதி மயிலாடுதுறை டவுன் ஸ்டேஷன் பழைய ரயில்வே ரோடு பகுதியில், பிள்ளையார் தோட்டத்தைச் சேர்ந்த சரவணன் (19) என்பவரை, போக்சோ வழக்கு சரித்திர பதிவேடு குற்றவாளியான அபிநாத் (21) வழிமறித்து மது குடிக்கப் பணம் கேட்டு மிரட்டியுள்ளார். பணம் தர மறுத்த சரவணனை அவர் அரிவாளால் கடுமையாகத் தாக்கியதை அடுத்து, மயிலாடுதுறை காவல்துறையினர் வழக்குப் பதிவு செய்து அபிநாத்தைக் கைது செய்து நீதிமன்றக் காவலுக்கு அனுப்பினர். மற்றொரு சம்பவமாக, ஆகஸ்ட் 30-ஆம் தேதி சீர்காழி அருகே தொடுவாய் பகுதியில் புதுச்சேரி சாராயத்தைச் சட்டவிரோதமாகப் பதுக்கி வைத்து விற்பனை செய்த பரமேஸ்வரி (55) என்பவரைச் சீர்காழி காவல்துறையினர் கைது செய்து சிறையிலடைத்தனர்.

தொடர்ந்து பொதுமக்களுக்கு இடையூறாகவும், சட்டவிரோத செயல்களிலும் ஈடுபட்டு வந்த இவர்கள் இருவரையும் சாதாரண சட்டங்களின் கீழ் மட்டும் தடுத்து நிறுத்த முடியாது என்பதால், அவர்கள் மீது குண்டர் தடுப்பு காவல் சட்டத்தின் கீழ் நடவடிக்கை எடுக்க மயிலாடுதுறை மாவட்ட காவல் கண்காணிப்பாளர் Dr. B. சினேஹா ப்ரியா, மாவட்ட ஆட்சியருக்குப் பரிந்துரை செய்தார். எஸ்பியின் பரிந்துரையை பரிசீலித்த மாவட்ட ஆட்சியர், செப்டம்பர் 29-ஆம் தேதி இருவரையும் தடுப்புக் காவல் சட்டத்தில் அடைக்க உத்தரவிட்டதைத் தொடர்ந்து, செப்டம்பர் 30-ஆம் தேதி இருவரும் முறைப்படி குண்டர் சட்டத்தின் கீழ் சிறையிலடைக்கப்பட்டனர்.

மயிலாடுதுறை மாவட்டத்தில் சட்டம் ஒழுங்கைப் பராமரிக்கவும் குற்றங்களை முற்றிலுமாக ஒழிக்கவும் தொடர் நடவடிக்கைகள் எடுக்கப்பட்டு வருகின்றன. இதன் விளைவாக, நடப்பாண்டில் மட்டும் தீவிர குற்றச் செயல்களில் ஈடுபட்ட 65 நபர்கள் மீது தடுப்புக் காவல் சட்டத்தின் கீழ் நடவடிக்கை எடுக்கப்பட்டுள்ளது. இதில் கொலை வழக்கில் தொடர்புடைய 5 பேர், பொது அமைதிக்கு பங்கம் விளைவித்த 25 பேர், மதுவிலக்கு குற்றங்களில் ஈடுபட்ட 10 பேர், கஞ்சா விற்பனையில் ஈடுபட்ட 21 பேர், தடைசெய்யப்பட்ட புகையிலை விற்பனை செய்த ஒருவர் மற்றும் பாலியல் குற்றங்களில் ஈடுபட்ட 3 பேர் அடங்குவர்.

மாவட்டத்தின் அமைதியைச் சீர்குலைக்கும் சமூக விரோதச் செயல்களில் ஈடுபடும் நபர்களின் நடவடிக்கைகள் அனைத்தும் காவல்துறையினரால் தீவிரமாகக் கண்காணிக்கப்பட்டு வருகின்றன. பொதுமக்களுக்கு அச்சுறுத்தல் தரும் வகையில் ரௌடிசத்தில் ஈடுபடுபவர்கள், பெண்கள் மற்றும் குழந்தைகளுக்கு எதிரான பாலியல் குற்றங்களில் ஈடுபடுபவர்கள், கஞ்சா, புகையிலைப் பொருட்கள் மற்றும் சட்டவிரோத மது விற்பனையில் ஈடுபடுவோர் மீது எவ்வித தயவுமின்றி குண்டர் தடுப்புக் காவல் சட்டத்தின் கீழ் மிகக் கடுமையான நடவடிக்கை எடுக்கப்படும் என்று மாவட்ட காவல் கண்காணிப்பாளர் எச்சரிக்கை விடுத்துள்ளார்.