“நாடோடி வாழ்க்கை…” கர்ப்பிணியின் ஆசையை நிறைவேற்றிய தன்னார்வ அமைப்பினர்… நெகிழ்ச்சி சம்பவம்…!!

திண்டுக்கல் – கரூர் சாலையில் உள்ள ரயில்வே மேம்பாலம் அருகே தற்காலிகமாகத் தங்கியிருக்கும் நாடோடி தம்பதியினர் கருத்தம்மா மற்றும் அர்ஜூன். இவர்கள் ஊர் ஊராகச் சென்று உறுமியடித்தும், சாட்டையால் தங்களைத் தாங்களே அடித்துக் கொண்டும் அதன் மூலம் யாசகம் பெற்று பிழைப்பு நடத்தி வருகின்றனர். இவர்களுக்கு நிரந்தர வீடு கிடையாது.

ஒரு வருடத்திற்கு முன்பு அர்ஜூனைத் திருமணம் செய்து கொண்ட கருத்தம்மா, தற்போது நிறை மாத கர்ப்பிணியாக உள்ளார். நாடோடி சமூகத்தில் இதுவரையிலும் யாருக்கும் வளைகாப்பு நடத்தியிராத சூழலில், தனக்கு வளைகாப்பு நடத்த வேண்டும் என்ற ஏக்கம் கருத்தம்மாவுக்கு இருந்தது.

இந்நிலையில், பெண்கள் தலைமையிலான தனியார் தன்னார்வ அமைப்பு ஒன்று கருத்தம்மாளின் ஆசையை நிறைவேற்ற முன்வந்தது. திண்டுக்கல்லில் உள்ள ஒரு தனியார் கூடத்தில், சிகை அலங்காரம், புத்தாடை, சந்தனம், குங்குமம், வளையல்கள் மற்றும் 9 வகையான சாதங்களுடன் பாரம்பரிய முறைப்படி தடபுடலாக வளைகாப்பு விழா நடத்தப்பட்டது.

தனது ஆசையை நிறைவேற்றிய தன்னார்வ அமைப்பினருக்குக் கண்கலங்கியபடி நன்றி தெரிவித்தார் கருத்தம்மா. இந்த மனிதநேயமிக்க நிகழ்வில் நாடோடி கூட்டத்தைச் சேர்ந்த பெண்களும் ஆர்வத்துடன் பங்கேற்று கருத்தம்மாளை வாழ்த்தினர். நாடோடி பெண்ணுக்கு வளைகாப்பு நடத்திய இந்தச் சம்பவம் சமூக ஊடகங்களில் பலரின் வாழ்த்துக்களைப் பெற்று வருகிறது.