கட்சியின் சீனியர்களுக்கு ‘கட்டுப்பாடு’.. அப்செட்டில் செங்கோட்டையன், நாஞ்சில் சம்பத்?…. விஜய் எடுத்த அதிரடி முடிவால் செம ஷாக்….!

தமிழக வெற்றிக் கழகத்தின் தலைவர் விஜய், அண்மையில் கட்சியில் இணைந்த முக்கிய நிர்வாகிகளுக்குக் கடும் கட்டுப்பாடுகளை விதித்துள்ளதாகத் தகவல்கள் வெளியாகியுள்ளன. குறிப்பாக, அதிமுக முன்னாள் அமைச்சர் செங்கோட்டையன் மற்றும் நட்சத்திரப் பேச்சாளர் நாஞ்சில் சம்பத் போன்ற சீனியர் தலைவர்கள் ஊடக விவாதங்களில் கலந்துகொள்வதற்கும், கட்சி விவகாரங்கள் குறித்து பொதுவெளியில் கருத்து தெரிவிப்பதற்கும் அதிரடித் தடை விதிக்கப்பட்டுள்ளது. கட்சியின் ஒழுங்கு மற்றும் ஒருமைப்பாட்டைப் பாதுகாக்கும் நோக்கில் இந்த ‘வாய்ப்பூட்டு’ உத்தரவு பிறப்பிக்கப்பட்டதாக அரசியல் வட்டாரங்கள் தெரிவிக்கின்றன.

தற்போது நடிகர் விஜய் எதிர்கொண்டு வரும் டெல்லி சிபிஐ விசாரணை மற்றும் அவரது கடைசித் திரைப்படமான ‘ஜனநாயகன்’ வெளியீட்டில் நிலவும் தணிக்கை சிக்கல்கள் குறித்து நிர்வாகிகள் யாரும் தன்னிச்சையாகப் பேசக்கூடாது என்று அறிவுறுத்தப்பட்டுள்ளது. சமூக வலைதளங்களில் இது தொடர்பாகப் பகிரப்படும் பதிவுகளை ரீட்வீட் செய்யக்கூட அனுமதி மறுக்கப்பட்டுள்ளது. இத்தகைய சர்ச்சைக்குரிய விவகாரங்களில் தலைமையின் அதிகாரப்பூர்வ நிலைப்பாட்டைத் தாண்டி நிர்வாகிகள் பேசும் கருத்துக்கள், கட்சிக்குத் தேவையற்ற நெருக்கடிகளை உருவாக்கும் என்பதால் இந்த நடவடிக்கை எடுக்கப்பட்டுள்ளதாகக் கூறப்படுகிறது.

கட்சியில் இணைந்த குறுகிய காலத்திலேயே அதிக அளவில் பேட்டிகள் கொடுத்து வந்த நாஞ்சில் சம்பத் போன்றவர்களுக்கு, இந்த திடீர் கட்டுப்பாடுகள் பெரும் அதிர்ச்சியை ஏற்படுத்தியுள்ளன. ஜெயலலிதா காலத்தில் கூட கருத்துச் சுதந்திரம் இருந்ததாகவும், ஆனால் புதிய கட்சியில் இவ்வளவு சீக்கிரம் சென்சார் முறை கொண்டு வரப்பட்டிருப்பது ஜனநாயகமற்ற செயல் என்றும் கட்சிக்குள்ளேயே முணுமுணுப்புகள் எழுந்துள்ளன. மூத்த தலைவர்கள் ஓரங்கட்டப்படுவதாக எழும் விமர்சனங்கள் தவெக வட்டாரத்தில் பெரும் பரபரப்பை ஏற்படுத்தியுள்ளது.